Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 111 Hüküm no: 94 Orijinal metin no: [13b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Râbia Hâtun’un kocası Muharrem’in miras kalan ev hissesini diğer varis Mustafa Beşe’ye sattığı, evin bahçesinde kendisi tarafından ekilen çiçeklerin teslimini istediği Mahrûsa-i Galata’ya tâbi‘ kasaba-i Kasımpaşa’da el-Hâc Ahmed mahallesinde sâkine iken bundan akdem müteveffât olan Râbia bt. Mehmed nâm hâtunun verâseti zevc-i metrûkü el-Hâc Muharrem b. Ali nâm kimesne ile babasının li ebeveyn kız karındaşı oğlu Mustafa Beşe b. İsa nâm kimesneye münhasıra olduğu şer‘an zâhir ve mütehakkik oldukdan sonra işbu râfi‘ü’l-kitâb mezbûr el-Hâc Muharrem mahfil-i kazâda mezbûr Mustafa Beşe mahzarında üzerine da‘vâ ve takrîr-i kelâm edip mahalle-i merkūmede vâki‘ bir tarafdan mezbûr el-Hâc Ahmed vakfı ve bir tarafdan ba‘zan mahalle-i mezbûre imâmına meşrûta olan vakıf menzil ve ba‘zan Emine nâm hâtun mülkü ve iki tarafdan tarîk-i âm ile mahdûd bir bâb fevkānî ve bir bâb tahtânî odaları ve iki ahırı ve bir süt ahırı ve bi’r-i mâyı ve kenîfi ve avluyu ve zât-ı eşcâr-ı müsmire ve gayr-ı müsmire bahçeyi müştemil menzil-i mezbûre Râbia Hâtun’un mülkü olup ba‘de vefâtihâ nısfı bana ve nısf-ı âharı merkūm Mustafa Beşe’ye intikāl etmekle zikr olunan menzilin bahçesinde mukaddemâ kendi malım ile iştirâ ve gars eylediğim on altı tahta lâle ve on üç tahta zerrîn kadeh ve iki tahta sünbül ve bir tahta (…) ki cem‘an otuz iki guruş şükûfemden mâ‘adâ menzil-i mezbûrda olan nısf hisse-i şer‘iyyemi mukaddemâ mezbûr Mustafa Beşe’ye yirmi bin akçeye bey‘ ve teslîm ol dahi vech-i muharrer üzre iştirâ ve kabûl edip zikr olunan şükûfem menzil-i mezkûrun bahçesinde kalmışidi hâlâ zikr olunan otuz iki tahta şükûfemi mezbûrdan taleb eylediğimde teslîmden imtinâ‘ eder suâl olunup bana teslîm için mezbûr Mustafa Beşe’ye tenbîh olunmak matlûbumdur dedikde gıbbe’s-suâl mezbûr Mustafa Beşe cevâbında fi’l-hakīka hâl minvâl-i muharrer üzre olmuşdur deyû bi tav‘ihî ikrâr ve i‘tirâf etmeğin alâ mûcebi i‘tirâfihî sâlifü’z-zikr otuz iki tahta şükûfeyi müdde‘î-i mezbûr el-Hâc Muharrem’e teslîme mezbûr Mustafa Beşe’ye tenbîh birle mâ vaka‘a bi’t-taleb ketb olundu. Fi’l-yevmi’s-sâmin aşer min şehri Ramazâni’l-mübârek li sene selâse ve seb‘în ve elf Şuhûdü’l-hâl: Es-Seyyid Ali Çelebi b. es-Seyyid Mehmed, Halil Çorbacı b. İdris, Hasan Efendi b. Şaban el-İmâm, Hasan Efendi b. Ahmed el-Müezzin, Mahmud Efendi b. Mehmed, Mustafa b. Receb, Musa b. Receb, Ahmed Yazıcı b. Mehmed, Hüseyin b. Abdullah ve gayruhüm.