Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 113 Hüküm no: 97 Orijinal metin no: [14a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tüccar Şaban Hoca’nın satın alıp İstanbul’a getirdiği, ancak bir kısmı yolda çürüyüp denize dökülen limon için gemiciye navlun ücreti ödemesinin gerekmediği Mahmiye-i Galata’da bi’l-fi‘l voyvoda ve beytülmâl emîni olan umdetü’l-a‘yân Siyavuş Ağa b. Abdülmennân tarafından husûs-ı câi’z-zikre vekîl-i müsecceli olan Osman Ağa b. ( ) mahfil-i kazâda tüccâr tâifesinden işbu râfi‘ü’l-kitâb Şaban Hoca b. Murad mahzarında üzerine bi’l-vekâle da‘vâ ve takrîr-i kelâm edip bundan akdem mezbûr Şaban Hoca cezîre-i İstanköy iskelesinde her bin limonun navlu yüz on beş akçeye olmak üzre yüz on altı bin limonu İstanbul’a getirmek için cem‘an on üç bin üç yüz kırk akçe navul ile cezîre-i merkūme sükkânından olan Agusti Reis’in sefînesine vaz‘ ve tahmîl edip navlundan ale’l-hesâb bin dokuz yüz doksan iki akçesin bi’d-defe‘ât reis-i mezbûr Agusti’ye def‘ edip bâkī on bir bin üç yüz kırk sekiz akçesini kable’l-istifsâr reis-i merkūm hâlik olup zâhirde vâris-i ma‘rûfu olmamağla muhallefâtı beytülmâle âid olmağın hâlâ navul-ı merkūmdan bâkī on bir bin üç yüz kırk sekiz akçeyi mezbûrdan taleb ederim suâl olunup alıverilmesi murâdımdır dedikde gıbbe’s-suâl merkūm Şaban Hoca cevâbında fi’l-vâki‘ cezîre-i merkūme iskelesinde İstanbul’a getirip bana teslîm etmek üzre her bin limonun navlu yüz on beş akçeden yüz on altı bin aded limonumu reis-i merkūmun sefînesine vaz‘ edip İstanbul’a gelir iken zikr olunan limonun bir mikdârı deryâ havasıyla çürüyüp fâsid olup deryâya ilkā olunmağıyla İstanbul’a geldiğimizde hâlik-i mezbûrun gemicileri bana sahîhan ancak yirmi bin limon teslîm edip yirmi bin limonun vech-i muharrer üzre olan iki bin üç yüz akçe navlundan dahi hâlik-i merkūme hayâtda iken teslîm eylediğim bin dokuz yüz doksan iki akçeden mâ‘adâ navl-ı mezbûrdan zimmetimde ancak üç yüz sekiz akçe kalmışdır deyicek İstanbul iskelesinde sahîhan halâs olup merkūm Şaban Hoca’nın kabz eylediği limon yirmi binden ziyâde olduğunu mübeyyine vekîl-i mezbûrdan beyyine taleb olundukda ityân-ı beyyineden izhâr-ı acz ile istihlâf etmeğin halâs olan limon yirmi binden ziyâde olmadığına merkūm Şaban Hoca’ya yemîn teklîf olundukda ol dahi hasbe’l-mes’ûl yemîn billâhi’l-aliyyi’l-azîm eyledikden sonra ücret-i menfa‘at mukābelesinde olup çürüyüp fâsid olmağla deryâya ilkā olunan limondan navul lâzım gelmemekle navl-ı merkūmdan bâkī üç yüz sekiz akçeyi vekîl-i mezbûr kabz eyledikden sonra ziyâde talebinden men‘ birle mâ vaka‘a bi’t-taleb ketb olundu. Fî 5 Ramazân sene 1073 Şuhûdü’l-hâl: Mustafa Kapudân [b.] Musa, Ebûbekir Beşe [b.] Şaban, Mustafa Çelebi [b.] Receb, Musa [b.] Receb, Emrullah [b.] Mehmed.