Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 123 Hüküm no: 112 Orijinal metin no: [16a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dışardan deri getiren tüccarın derileri koltukçulara satmalarının önüne geçilip debbağ esnafına satmalarının temini Mahrûsa-i İstanbul’da Yedikule kurbunda vâki‘ debbâğ tâifesinden Ahi Baba olan Ali Çelebi b. Süleyman ve tâife-i merkūme kethüdâsı el-Hâc Sâlim b. Mustafa ve yiğitbaşısı es-Seyyid Mehmed Çelebi b. Receb ve İbrahim Dede b. Davud ve el-Hâc Hasan b. İshak ve sâirleri mahfil-i kazâda tüccâr tâifesinden Sefer b. Sefer ve es-Seyyid Osman b. ( ) ve Ömer ve Bursalı Yusuf b. Abdullah nâm kimesneler mahzarlarında üzerlerine da‘vâ ve takrîr-i kelâm edip kadîmden bu âna gelinceye değin mahmiye-i İstanbul ve Galata ve tevâbi‘leri olan kasabâta hâricden tâcirler getirdikleri ham su sığırı ve kara sığır ve inek derileri metâ‘ımız olmağla semen-i misli ve değer bahâsıyla bize bey‘ ede gelmişler iken hâlâ mezbûrûn Sefer ve es-Seyyid Osman ve Ömer ve Yusuf nâm kimesneler hâricden getirdikleri derilerini biz mîrîye ziyâde kösele verip köseleye müzâyakamız var iken bize bey‘ etmeyip âhardan koltukçulara bey‘ etmelerinden küllî gadr eylediklerin ve düstûr-ı mükerrem müşîr-i müfahham nâzım-ı menâzım-ı muntazım-ı ümem muslih-i mesâlih-i benî Âdem bi’l-fi‘l kāimmakām-ı vezâret-i uzmâ ve mesned nişîn-i vekâlet-i kübrâ olan sa‘âdetli İsmail Paşa -yesserallâhu emâniyehû yeşâ’ hazretlerine arzuhâl eylediğimizde fazîletli Galata efendisi hazretleri tâife-i merkūmenin ahvâlini göre deyû yedimize buyruldu-yı şerîf verilmişdir nazar olunup mûcebince ba‘de’l-yevm tâcirûn-ı merkūmûn getirdikleri sâlifü’z-zikr derilerini âhardan koltukçulara bey‘ etmeyip ancak bize bey‘ etmeleri için mezbûrûna tenbîh olunmak matlûbumdur suâl olunsun dediklerinde gıbbe’s-suâl merkūmûn tâcirler cevâblarında fi’l-vâki‘ hâl minvâl-i muharrer üzre olduğu her biri ikrâr ve i‘tirâf etmeğin alâ mûceb-i ikrârihim hâricden getirdikleri mârrü’z-zikr derilerini semen-i misli ve değer bahâsıyla tâife-i merkūmeye bey‘ etmeğe mezbûrûn tâcirlere tenbîh birle mâ vaka‘a bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Siyavuş b. Abdullah, Âbid b. Mustafa, Emrullah b. Mustafa