Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 122 Hüküm no: 111 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Asteri bt. Pertola’nın Zabeta bt. Yorgi’de kalan alacağını tahsil etmesi Mahrûsa-i Galata’ya tâbi‘ kasaba-i Kasımpaşa’da Yahya Kethüdâ mahallesinde sâkine Asteri bt. Pertola nâm nasrâniye meclis-i şer‘-i hatîr-i lâzımü’t-tevkīrde mahrûsa-i mezbûrede Bereketzâde mahallesinde sâkine işbu râfi‘atü’l-vesîka Zabeta bt. Yorgi nâm nasrâniye tarafından ikrâr-ı âti’l-beyânı tasdîka vekîl olup merkūme ma‘rifet-i şer‘iyye ile ârifân olan Osman Çavuş b. Receb ve el-Hâc Mehmed b. Abdullah nâm kimesneler şehâdetleri ile hasm-ı şer‘î-i câhid mahzarında vekâleti sâbite olan Yani v. İstavriti nâm zimmî muvâcehesinde ikrâr ve takrîr-i kelâm edip müvekkile-i mezbûre Zabeta zimmetinde cihet-i karz-ı şer‘îden iki bin akçe hakkım olup meblağ-ı mezbûrun bin akçesini mukaddemâ müvekkile-i mezbûre ile beynimizde vâki‘ olan sâkıt da‘vâsının bedel-i sulhüne takās olunup ben dahi mukāssa ve kabûl eylediğimden sonra meblağ-ı bâkī bin akçesi müvekkile-i mezbûrenin zimmetinde kalmışidi el-hâletü hâzihî meblağ-ı mezbûr bin akçeyi merkūme Zabeta yedinden bi’t-tamâm ve’l-kemâl ahz ü kabz eyledim min ba‘d meblağ-ı mezbûr iki bin akçeden müvekkile-i mezbûre zimmetinde bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb ve terkīm olundu. Hurrire fi’l-yevmi’l-âşir min şehri Ramazâni’l-mübârek li sene selâse ve seb‘în ve elf Şuhûdü’l-hâl: Nasuh Efendi [b.] Yusuf, el-Hâc Osman b. Ali, Hüseyin b. Abdullah, Mustafa b. Receb, Ahmed Yazıcı b. Mehmed, Hüseyin b. Mirza