Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 124 Hüküm no: 114 Orijinal metin no: [16b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zamane Hâtun’un ölmeden önce evini Ali Reis b. Hasan’a hibe ettiğinin ortaya çıkması Mahmiye-i Galata’da voyvoda ve beytülmâl emîni olan umdetü’l-a‘yân Siyavuş Ağa b. Abdülmennân tarafından husûs-ı âti’l-beyâna vekîl-i müsecceli olan Hasan Ağa b. ( ) mahfil-i kazâda kasaba-i Tophâne’de Cihangir mahallesi sükkânından râfi‘u hâze’l-kitâb Ali Reis b. Hasan nâm kimesne mahzarında üzerine bi’l-vekâle da‘vâ ve takrîr-i kelâm edip mahalle-i mezbûrede sâkin iken bundan akdem bilâ-veled fevt olmağla muhallefâtı beytülmâle âid olan Zamâne Hâtun’un muhallefâtından olup mahalle-i merkūmede vâki‘ bir tarafdan Ahmed Bey veresesi mülkleri ve bir tarafdan es-Seyyid el-Hâc Yusuf b. ( ) mülkü ve bir tarafdan el-Hâc Mehmed b. ( ) mülkü ve bir tarafdan tarîk-i âm ile mahdûd olup bir bâb tahtânî beyti ve bir sofa ve müşterek bir kenîfi müştemil olan mülk menziline merkūm Ali Reis bi gayri hakkın vaz‘-ı yed eder suâl olunup menzil-i mezbûrdan kasr-ı yed ve bana teslîme tenbîh olunmak matlûbumdur dedikde gıbbe’s-suâl mezbûr Ali Reis cevâbında müteveffât-ı mezbûre Zamâne Hâtun târih-i kitâbdan dört buçuk sene mukaddem hâl-i hayâtında ve kemâl ve akl-ı sıhhatinde iken mülkü olan menzil-i mahdûd-ı mezkûru ba‘de’t-tahliyye bana hibe-i sahîha-i şer‘iyye ile hibe ve temlîk ve teslîm ben dahi meclis-i hibede ittihâb ve temellük ve kabz edip mülk-i mevhûbum olmağla vaz‘-ı yed ederim deyicek vekîl-i merkūm Hasan Ağa istintâk olundukda husûs-ı mezbûru bi’l-külliyye münkir olmağın mersûm Ali Reis’den sıdk-ı makālini mübeyyine beyyine taleb olundukda udûl-i ricâlden Hasan Efendi b. Mehmed el-İmâm ve Esad Çelebi b. Hasan ve Mehmed b. Mehmed el-Müezzin nâm kimesneler li ecli’ş-şehâde meclis-i şer‘a hâzırânûn olup istişhâd olunduklarında fi’l-vâki‘ müteveffât-ı merkūme Zamâne dört buçuk sene mukaddem hâl-i hayât ve kemâl-i sıhhatinde iken mülkü olan menzil-i mahdûd-ı mezkûru ba‘de’t-tahliyyeti’ş-şer‘iyye merkūm Ali Reis’e bizim huzûrumuzda hibe ve temlîk ve teslîm ol dahi meclis-i mezbûrda ittihâb ve temellük ve kabz u kabûl eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağla vekîl-i mezbûr mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’l-hâdî aşer min şehri Ramazâni’l-mübârek sene selâse ve seb‘în ve elf Şuhûdü’l-hâl: Mehmed b. İbrahim, İbrahim b. Mehmed, Mustafa Çelebi b. Receb, Ahmed b. ( ), Âbid b. Mustafa.