Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 125 Hüküm no: 115 Orijinal metin no: [16b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Erine bt. Yorgi’nin Sultana bt. Salamon’a rehin bıraktığı eşya ve para ile ilgili davada sulh sağlandığı Mahmiye-i Galata dâhilinde Sultan Bayezid mahallesinde sâkine Erine bt. Yorgi nâm nasrâniye meclis-i şer‘-i hatîr-i lâzımü’t-tevkīrde mahmiye-i mezbûreye tâbi‘ Kuruçeşme nâm karyede sâkine Sultana bt. Salamon nâm yahudiye muvâcehesinde bi tav‘ihâ ikrâr ve takrîr-i kelâm edip bundan akdem mezbûre Sultana yedinden iktirâz ve kabz eylediğim sekiz kıt‘a riyâlî guruş mukābelesinde mülküm olan bin akçe kıymetli dokuz zirâ‘ al kemha ve altı yüz akçe kıymetli bir çift küpe rehin vaz‘ ve teslîm ol dahi vech-i muharrer üzre irtihân ve kabz eyledikden sonra meblağ-ı mezbûru kendiye edâ ve teslîm ol dahi yedimden kabz ve tesellüm edip rihân-ı mezkûreyi taleb eylediğimde bana teslîm etmeyip âhar yere nakl ve istihlâk etmekle kıymet-i şer‘iyye-i mezkûrelerini merkūmeden da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî vesâtat-ı muslihîn ile da‘vâ-yı mezkûremden mezbûre Sultana beni an ikrâr bin akçe bedel üzerine sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûru tamâmen yedinden ahz ü kabz, rihân-ı mezkûre müte‘allika âmme-i de‘âvî ve mütâlebâtdan mezbûre Sultana’nın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min şehri Ramazâni’l-mübârek sene selâse ve seb‘în ve elf. Şuhûdü’l-hâl: Mustafa b. Receb, Musa b. Receb, Hüseyin b. Abdullah, Âbid b. Mustafa, Hüseyin b. Abdullah