Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 146 Hüküm no: 146 Orijinal metin no: [19a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Salamon v. Miradodo’nun es-Seyyid Mehmed b. Mehmed’e olan borcunu taksite bağlaması Mahrûsa-i İstanbul’da Balat kurbunda sâkin Hanya cemâ‘atinden Salamon v. Mirado nâm yahudi meclis-i şer‘-i hatîr-i lâzımü’t-tevkīrde mahmiye-i Galata dâhilinde Alaca Mescid mahallesinde sâkin işbu râfi‘ü’l-kitâb es-Seyyid Mehmed b. es-Seyyid Mansur nâm kimesne mahzarında ikrâr ve takrîr-i kelâm edip mezbûr es-Seyyid Mehmed Çelebi’ye keyli beynimizde ma‘lûm yedinden müşterâ ve makbûz kenevir tohumu bahâsından üç bin yüz akçe deynim olup lâkin meblağ-ı mezbûru merkūma def‘aten edâya iktidârım olmayıp taksîte tâlib olduğumda mezbûr es-Seyyid Mehmed Çelebi meblağ-ı mezbûru târih-i kitâbdan otuz ay tamâmına değin her ay tamâmında kendiye yüzer akçe vermek üzre taksît ve te’cîl edip ben dahi taksît-i merkūmu kabûl etmeğin meblağ-ı mezkûr üç bin yüz akçe vech-i muharrer üzre mezbûr es-Seyyid Mehmed Çelebi’ye zimmetimde mukassat ve müeccel deynimdir dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Mustafa Çelebi b. Receb, Eyüb Bey b. ( ), Musa b. Receb, Âbid b. Mustafa, Ahmed Yazıcı b. Mehmed.