Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 145 Hüküm no: 145 Orijinal metin no: [19a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Yakub’dan Hasan b. Mustafa’ya kalan değirmene kendisine satıldığı iddiasıyla el koyan Hüseyin Beşe’nin Mustafa’nın hissesini geri vermesi gerektiği Vilâyet-i Anadolu’da vâki‘ Yakubbey Derbendi kazâsına tâbi‘ Kısacık nâm karyede sâkin iken bundan akdem vefât eden Mehmed b. Yakub’un verâseti zevce-i metrûkesi Âişe bt. ( ) nâm hâtun ile li ebeveyn kız karındaşı oğlu Hasan b. Mustafa nâm kimesneye münhasıra olduğu şer‘an zâhir ve müte‘ayyin oldukdan sonra işbu râfi‘ü’l-kitâb mezbûr Hasan meclis-i şer‘-i hatîr-i lâzımü’t-tevkīrde zikri âtî değirmene vâzı‘ü’l-yed olan Hüseyin Beşe b. Sevindik nâm kimesne mahzarında üzerine da‘vâ ve takrîr-i kelâm edip karye-i mezbûrede vâki‘ inde’l-ahâlî ve’l-cîrân ma‘lûmü’l-hudûd bir göz su değirmeni müteveffâ-yı mezbûrun ile’l-vefât mülkü olup ba‘de vefâtihî mârrü’z-zikr değirmenin dört sehimden bir sehmi mezbûre Âişe’ye ve üç sehmi dahi bana irs-i şer‘le intikāl edip mülk-i mevrûsum iken mezbûr Hüseyin zikr olunan değirmeni müstakillen zabt ve tasarruf eder suâl olunup hisse-i merkūmemden kasr-ı yedine tenbîh olunmak matlûbumdur dedikde gıbbe’s-suâl mezbûr Hüseyin Beşe cevâbında fi’l-vâki‘ zikr olunan değirmeni müteveffâ-yı mezbûrun mülkü olup ba‘de vefâtihî vech-i muharrer üzre müdde‘î-i merkūm ile mezbûre Âişe’ye intikāl eylemişidi lâkin müdde‘î-i mezbûr Hasan mukaddemâ zikr olunan değirmenden hisse-i merkūmesini âhara bey‘ ve kabz-ı semene ve kendiye îsâle babası merkūm Mustafa’yı tarafından vekîl ve nâib-i menâb nasb ve ta‘yîn etmekle mezbûr Mustafa dahi ba‘de’l-kabûl vekâleten merkūme Âişe asâleten sâlifü’z-zikr değirmenin cümlesini yedi yüz akçeye her biri bey‘-i kat‘î ile bana bey‘ ve teslîm ben dahi iştirâ ve tesellüm ve kabûl ve def‘-i semen-i mezkûr edip mülk-i müşterâm olduğuna binâen vaz‘-ı yed edip tasarruf ederim deyicek gıbbe’l-istintâk ve’l-inkâr mezbûr Hüseyin Beşe’den takrîr-i meşrûhuna mutâbıka beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ zikr olunan değirmenden hisse-i şer‘iyye-i merkūmesini minvâl-i meşrûh üzre âhara bey‘ ve kabz-ı semene babası mezbûr Mustafa’yı tarafından vekîl nasb ve ta‘yîn etmeyip ve bey‘-i mezkûru dahi tecvîz etmediğine müdde‘î-i mezbûr Hüseyin’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle zikr olunan değirmenin dört sehimden müdde‘î-i mezbûrun hissesine isâbet eden üç sehimden kasr-ı yed etmek üzre mezbûr Hüseyin Beşe’ye tenbîh birle mâ vaka‘a bi’t-taleb ketb olundu. Hurrire fi’l-yevmi’s-sâlis ve’l-ışrîn min Ramazâni’l-mübârek li sene selâse ve seb‘în ve elf Şuhûdü’l-hâl: Mehmed Beşe b. Zeyneddin, Receb b. Sinan, Ramazan Beşe b. Himmet, Mustafa b. Mehmed, Mehmed b. Mustafa, Ahmed b. Abdi.