Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 149 Hüküm no: 153 Orijinal metin no: [20a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Franko v. Yorgi’nin Kirkor v. Arakil’e olan borcunu ödemesi Mahmiye-i [Galata] dâhilinde Karaköy’de bogasici tâifesinden işbu râfi‘ü’l-kitâb Kirkor v. Arakil nâm Ermeni mahfil-i kazâda Franko v. Yorgi nâm zimmî muvâcehesinde üzerine da‘vâ ve takrîr-i kelâm edip mezbûr Franko zimmetinde levn ve zirâ‘ı beynimizde ma‘lûm Acem metâ‘ı bahâsından ba‘de külli hesâb otuz kıt‘a riyâlî guruş hakkım olup taleb eylediğimde edâdan imtinâ‘ eder suâl olunup alıverilmesi murâdımdır dedikde gıbbe’s-suâl ve akībe’l-inkâr müdde‘î-i mezbûrdan sıdk-ı makālini mübeyyine beyyine taleb olundukda udûl-i ricâlden Ahmed Efendi b. Mustafa nâm kimesne ile Gaspar v. Melkon nâm Ermeni meclis-i şer‘a hâzırân olup istişhâd olunduklarında fi’l-vâki‘ levn ve zirâ‘ı beynlerinde ma‘lûm Acem metâ‘ı bahâsından ba‘de külli hesâb otuz kıt‘a riyâlî guruş müdde‘î-i mezbûre zimmetinde vâcibü’l-edâ deyni olduğunu merkūm Franko bizim huzûrumuzda ikrâr ve bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle meblağ-ı mezbûru müdde‘î-i merkūma edâ ve teslîme merkūm Franko’ya tenbîh birle mâ vaka‘a bi’t-taleb ketb olundu. Hurrire fi’l-yevmi’s-sâdis ve’l-ışrîn min Ramazâni’l-mübârek li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Âbid b. Mustafa, Muharrem b. Receb ve gayruhüm.