Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 150 Hüküm no: 154 Orijinal metin no: [20a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekredi ve Hırsafine’nin Calut Reis’in kızları olduğu sabit olduğundan kendisine düşen arsanı alınması gerektiği Vilâyet-i Kırım’da bi’l-fi-l mahrûsa-i Bahçesaray kadısı Ebûbekir Efendi b. Ahmed tarafından kitâb-ı naklî ve hitâb-ı hükmî vârid olup mazmûnu vilâyet-i merkūmede kasaba-i Balıklava’da el-Hâc Ali mahallesi sâkinelerinden Ekredi ve Hırsafine nâm nasrâniyelerden meşhûdün-bih âti’l-beyân vechi üzre da‘vâ-yı sahîha-i şer‘iyye ile mesbûk ve istişhâd-ı şer‘î sudûrundan sonra mahrûsa-i merkūme mahallâtından el-Hâc Mehmed mahallesi sâkinlerinden Ömer b. Ahmed b. Abdullah ve Mevlüd Beşe b. Abdurrahman b. Abdullah nâm kimesneler nakl ve tahvîl için mahall-i harc ve ta‘dîle li ecli’ş-şehâde hâzırân olup her biri şöyle edâ-i şehâdet eylediler ki mahmiye-i Galata müzâfâtından Tarabya nâm karyede iken bundan akdem hâlik olup muhallefâtından karye-i merkūmede vâki‘ mülk arsası yine karye-i mezbûrede sâkine Ezmerağda nâm nasrâniye yedinde mazbût idiği istimâ‘ olunan Calut Reis nâm zimmînin müsteşhidetân-ı merkūmetân Ekredi ve Hırsafine sulbiye kızları ve bi’l-inhisâr vâriseleridir mezbûretândan gayrı terekesine müstehıkk-ı âhar vârisi olduğu ma‘lûmumuz değildir babaları hâlik-i merkūmdan irsen kendilerine intikāl eden arsa-i mezkûreye vâzı‘atü’l-yed olan mezbûre Ezmerağda’da ve sâirînden müsteşhidetân-ı merkūmetân için hakk-ı taleb ve ahz vardır bu biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra arsa-i mezbûrede olan hisse-i şer‘iyyelerini bey‘a ve semenini kabza ve kendilere îsâle ve kabz ve îsâl mütevakkıf olduğu umûrun cümlesine müsteşhidetân-ı mezbûretân taraflarından nâkilü’l-kitâb Danyal v. Avram nâm zimmîyi vekîl ve nâib-i menâb nasb ve ta‘yîn eylediklerinde ol dahi vech-i meşrûh üzre vekâlet-i merkūmeyi kabûl ve hizmet-i lâzımesin edâya müte‘ahhid olduğunu hâvî bulunmağla vekîl-i mezbûr vâzı‘atü’l-yed olan merkūme Ezmerağda meclis-i şer‘iyye ihzâr edip merkūmenin muvâcehesinde kitâb-ı mezbûr feth ve kırâat olundukda arsa-i merkūmeye vaz‘-ı yedini ikrâr edip lâkin kitâb-ı mezbûrun mûmâ-ileyh efendi kıbelinden vürûdunu münkir olucak zeyl-i kitâbda muharrerü’l-esâmî olan şuhûd-ı tarîkden Hüseyin Çelebi b. Mehmed ve Mustafa b. Ali nâm kimesneler li ecli’ş-şehâde meclis-i mezbûra hâzırân olup istişhâd olunduklarında fi’l-vâki‘ kitâb-ı merkūm müşârün-ileyh efendi kıbelinden vârid olmuşdur, zirâ‘ tahtında olan hat ve zahrında olan hatm mevlânâ-yı mûmâ-ileyhin hat ve hatmidir, bizim huzûrumuzda imzâlayıp ve mühürleyip hat ve hatmine bizi işhâd eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâki‘ olmağın mûcebiyle arsa-i mezbûreden kasr-ı yed ve vekîl-i mezbûre def‘ ve teslîme mezbûre Ezmerağda’ya tenbîh birle mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: El-Hâc Mehmed b. Musa, Osman b. Habib, Hasan Çelebi b. Receb, el-Hâc Hüseyin b. el-Hâc Mehmed, Mustafa b. Receb, Âbid b. Mustafa ve gayruhüm.