Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 155 Hüküm no: 161 Orijinal metin no: [21a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zeynüddin’in mirasçılarının uzun zamandır evlerini kullanan İbrahim ile sulh yoluyla anlaşmaları Fi’l-asl vilâyet-i Anadolu’da Ezine kazâsına tâbi‘ Kayadibi nâm karyeden olup bundan akdem mahrûsa-i Galata’ya tâbi‘ kasaba-i Tophâne’de Çukurcâmi‘ mahallesinde sâkine iken vefât eden Zeynüddin nâm kimesnenin verâseti sulbiye-i kebîre kızları Halime ve Benefşe ve Meryem hâtunlara münhasıra olduğu şer‘an zâhir ve mütehakkik oldukdan sonra mezbûre Halime Hâtun kendi tarafından asâleten ve kız karındaşları mezbûretân Benefşe ve Meryem taraflarından sulh-i âti’l-beyâna vekîl olup bimâ hüve nehcü’s-sübût şer‘an vekâleti sâbite olmağla vekâleten meclis-i şer‘-i hatîr-i lâzımü’t-tevkīrde işbu râfi‘ü’l-kitâb İbrahim b. Ahmed nâm kimesne mahzarında bi’l-asâle ve vekâle ikrâr ve takrîr-i kelâm edip babamız müteveffâ-yı merkūmdan bize irs-i şer‘le intikāl eden karye-i merkūmede vâki‘ lede’l-ahâlî ve’l-cîrân ma‘lûmü’l-hudûd eşcâr-ı müsmire ve gayr-ı müsmireyi müştemil mülk bahçemizi biz âhar diyârda olmağla mezbûr İbrahim yirmi beş seneden mütecâviz fuzûlen zabt ve tasarruf edip müddet-i mezkûrede hâsıl olan mahsûlünü üç bin akçeye âhara bey‘ ve kabz-ı semen etmekle ben dahi semeni olan meblağ-ı mezbûr üç bin akçeyi asâleten ve vekâletim hasebiyle mezbûrdan da‘vâ ve taleb eylediğimde beynimizde münâza‘ât-ı kesîre vâkı‘a olmuşidi el-hâletü hâzihî vesâtat-ı muslihîn ile da‘vâ-yı mezkûremden mezbûr İbrahim beni üç yüz akçe bedel üzerine inşâ-i akd-i sulh eylediklerinde ben dahi asâleten ve vekâletim hasebiyle sulh-i merkūmu kabûl ve bedel-i sulh olan meblağ-ı merkūm-ı mezbûrun yedinden bi’l-asâle ve’l-vekâle ahz ü kabz edip mâ‘adâ da‘vâsından mezbûrun zimmetini ibrâ ve iskāt eyledim ba‘de’l-yevm zikr olunan bahçenin güzeşte mahsûlüne müte‘allika mezbûr ile vechen mine’l-vücûh da‘vâ ve nizâ‘ımız yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Receb Bey b. Hasan, Ali b. Ahmed, Sinan b. Ali, Musa b. Receb, Emrullah b. Mehmed ve gayruhüm.