Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 156 Hüküm no: 162 Orijinal metin no: [21a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kostati v. Velaka’nın mirasçılarının kendilerine intikal eden gemideki yarım hisselerini Yakomi Kapudân’a satmaları Medîne-i Ebî Eyyûb el-Ensârî nevâhîsinden Midye nâm kasaba sükkânından iken bundan akdem hâlik olan Kostanti v. Velaka nâm zimmînin verâseti kızları Sandali ve Kiradine ve Kokona nâm sagīrelere münhasıra olduğu şer‘an mütehakkik oldukdan sonra sagīrât-ı mezbûrâtın tesviye-i umûrlarına kıbel-i şer‘den mansûbe vasîleri olan Marola bt. Felamura tarafından zikri âtî bey‘a ve semenini kabza vekîl olup Yorgi v. Kalapan ve Yuvan v. Petro nâm zimmîler şehâdetleri ile hasm-ı şer‘î-i câhid mahzarında şer‘an vekâleti sâbite olan Todori v. Yuda ve mahalle-i Galata müzâfâtından Arnavudköyü’nde sâkin Kostanti v. Dimitri nâm zimmîler mahfil-i kazâda işbu râfi‘ü’l-kitâb Yakomi Reis v. Yani nâm zimmî muvâcehesinde mezbûr Kostanti bi’l-asâle ve merkūm Todori bi’l-vekâle ikrâr ve takrîr-i kelâm edip hâlâ mahmiye-i mezbûre hâricinde Kalafatyeri önünde merbût on üç zirâ‘ üstü açık zarbana ta‘bîr olunur sefîne teknesinin âlât-ı lâzımesiyle nısf-ı şâyi‘i sagīrât-ı mezbûrâtın babaları hâlik-i merkūmun mülkü oldu ba‘de helâkihî kızları mezbûrâna irsen intikāl etmeğin nısf-ı şâyi‘-i âharı merkūm Kostanti’nin mülkü olup ve sagīrât-ı merkūmâtın nafaka ve kisveye zarûretleri olup sefîne-i merkūmede olan nısf hisse-i şâyi‘alarından gayrı bey‘ olunacak ism-i mâl ıtlâk olunur bir nesneleri olmamağla sefîne-i merkūmede olan nısf hisselerinin şer‘an bey‘i lâzım gelmeğin asâleten ve vekâleten sefîne-i merkūmeyi mecmû‘ âlât-ı lâzımesiyle on iki bin sekiz yüz akçeye merkūm Yakomi Reis’e bâtten bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru mezbûr Yakomi’nin yedinden bi’t-tamâm ahz ü kabz eyledikde ba‘de’l-yevm sefîne-i mezbûrenin mecmû‘u merkūm Yakomi’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: El-Hâc Süleyman b. Hüseyin, Ahmed Yazıcı b. Mehmed, Mustafa b. Receb, Âbid b. Mustafa, Muharrem b. Receb ve gayruhüm.