Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 162 Hüküm no: 172 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Midilli sancağı beyi Mustafa Bey’in kölesini Andriye ve Mikel’e satması Bi’l-fi‘l cezîre-i Midilli sancağı beyi umdetü’l-ümerâi’l-kirâm Mustafa Bey b. Mehmed Bey tarafından ikrâr-ı câi’z-zikre vekîl olup hasm-ı şer‘î-i câhid mahzarında Hüseyin b. Ahmed ve Mehmed b. Ali şehâdetleri ile şer‘an vekâleti sâbite olan Lütfullah Reis b. Mehmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’s-sifr Andriye Kapudân v. Gavril ve Mikel v. Agusti nâm müste’menler muvâcehelerinde bi’l-vekâle ikrâr ve takrîr-i kelâm edip müvekkilim müşârün-ileyh kendi abd-i memlûkü olan uzun boylu elâ gözlü açık kaşlı Efrenciyyü’l-asl işbu hâzır bi’l-meclis Yani v. Nikolo nâm rakīkini mezbûrân Andriye ve Mikel’e iki yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip anlar dahi iştirâ ve tesellüm eylediklerinden sonra semeni olan meblağ-ı mezbûru müvekkilim mûmâ-ileyh mezbûrânın yedlerinden tamâmen ahz ü kabz eyledi ba‘de’l-yevm mevsûf-ı mezbûr merkūmânın abd-i müşterâlarıdır. Keyfe mâ yeşâ’ mutasarrıf olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb olundu Hurrire fi’l-yevmi’t-tâsi‘ ve’l-ışrîn min şehri Ramazâni’l-mübârek li sene selâse ve seb‘în ve elf Şuhûdü’l-hâl: Ramazan Reis b. ( ), Mustafa Kethüdâ b. ( ), Ahmed tâbi‘-i İbrahim Çelebi, Mustafa Çelebi b. Kara Yazıcı, Topçu Ali b. ( ), Eyüb Bey b. Ser-muhzırân, Musa b. Receb, Zülfikār b. İbrahim.