Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 163 Hüküm no: 174 Orijinal metin no: [22b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Mehmed’in kullandığı odanın Turfanda Hâtun’un mirasçılarına ait olduğundan onlara teslimi gerektiği Vilâyet-i Anadolu’da Bolaman kazâsına tâbi‘ Keyfçukuru nâm karyede sâkin iken bundan akdem müteveffât olan Turfanda nâm hâtunun verâseti sulbiye kebîre kızı Kezban ile sulbî kebîr oğlu Şükrullah b. Ramazan’a münhasıra olduğu şer‘an zâhir oldukdan sonra mezbûr Şükrullah asâleten ve karındaşı mezbûre Kezban tarafından vekâleten meclis-i şer‘-i hatîr-i lâzımü’t-tevkīrde yine karye-i mezbûre sâkinlerinden Ahmed b. Mehmed nâm kimesne mahzarında üzerine bi’l-asâle ve bi’l-vekâle da‘vâ ve takrîr-i kelâm edip vâlidemiz müteveffât-ı mezbûreden benim ile karındaşım mezbûre Kezban’a irs-i şer‘î ile intikāl edip karye-i mezbûrede vâki‘ bir tarafdan Yusuf mülkü ve bir tarafdan Mehmed mülkü ve bir tarafdan Ahmed mülkü ve bir tarafdan tarîk-i âm ile mahdûd bir bâb tahtânî odamızı mezbûr Ahmed fuzûlen zabt [ve] tasarruf eder suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Ahmed cevâbında fi’l-vâki‘ zikr olunan oda mezbûr Şükrullah ile karındaşı ve müvekkilesi mezbûre Kezban’a vâlideleri müteveffât-ı mezbûreden intikāl edip mülk-i mevrûsları olduğu ve kendi fuzûlen zabt ve tasarruf eylediğin bi tav‘ihî ikrâr ve i‘tirâf etmeğin mûcebince zikr olunan odadan kasr-ı yedine tenbîh birle mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis min şehri Şevvâli’l-mükerrem li sene selâse ve seb‘în ve elf Şuhûdü’l-hâl: Mustafa b. Receb, Musa b. Receb, Emrullah b. Mehmed, Hasan b. Abdullah ve gayruhüm mine’l-huzzâr.