Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 164 Hüküm no: 175 Orijinal metin no: [22b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Mihal’in İstemad’ın babası Nikola’ya hizmeti karşılığı olan alacağı hususunda sulh olduğu Vilâyet-i Rumeli’nde vâki‘ Benefşe nâm kasabada olup meyhâneci tâifesinden Yani v. Mihal nâm zimmî meclis-i şer‘-i hatîr-i lâzımü’t-tevkīrde kasaba-i merkūmede sâkin iken bundan akdem hâlik olan Nikola Livano nâm zimmînin sulbî kebîr oğlu ve hasren vârisi işbu vâki‘ü’s-sifr İstemad nâm zimmî muvâcehesinde ikrâr ve takrîr-i kelâm edip mukaddemâ ben hâlik-i mezbûra on sene mikdârı hizmet etmekle ecr-i mislim olan on bin akçe mukābelesinde hâlik-i merkūm hâl-i hayâtında silk-i mülkünde münselik olup kasaba-i merkūmede vâki‘ hudûdları beynimizde ma‘lûm bir menzil ve bir kıt‘a bağını bana hibe ve teslîm ben dahi ittihâb ve tesellüm ve kabûl edip mülk-i mevhûbum olmuşiken merkūm İstemad tasarrufuma mâni‘ olur deyû mezbûrdan da‘vâ ve taleb eylediğimde beynimizde münâza‘ât-ı kesîre vâkı‘a olmuşidi el-hâletü hâzîhî vesâtat-ı muslihîn ile mezbûr İstemad beni bin akçe üzre inşâ-i akd-i sulh eylediğinde ben dahi sulh-i merkūmu kabûl ve bedel-i sulh olan meblağ-ı merkūmu mezbûr İstemad yedinden bi’t-tamâm ve’l-kemâl ahz ü kabz eyledim ba‘de’l-yevm zikr olunan menzili ve bağ ile ecr-i misline müte‘allik âmme-i de‘âvîden merkūm İstemad’ın ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu ve terkīm olundu. Hurrire fi’l-yevmi’s-selh min şehri Ramazâni’l-mübârek li sene selâse ve seb‘în ve elf Şuhûdü’l-hâl: El-Hâc Şakir b. Fazlı, fahrü’l-kuzât Mehmed Efendi b. Musa, Mehmed Reis b. Ahmed, Musa Beşe b. Receb, Abdullah b. Mehmed, Hasan b. Mehmed, Hasan b. Muharrem, Emrullah b. Mehmed ve gayruhüm.