Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 165 Hüküm no: 177 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Mustafa’nın İbrahim Reis b. Mustafa’ya borç verdiği paranın mudarebe ile değil karz olduğu Mahmiye-i İstanbul’da vâki‘ Mercan odalarının birinde sâkin işbu râfi‘ü’l-kitâb Ali Beşe b. Mustafa nâm kimesne mahfil-i kazâda mellâh tâifesinden İbrahim Reis b. Mustafa nâm kimesne mahzarında üzerine da‘vâ ve takrîr-i kelâm edip târih-i kitâbdan sekiz ay mukaddem mezbûr İbrahim Reis’e bi tarîki’l-karz iki bin akçe def‘ ve teslîm ol dahi vech-i muharrer üzre ahz ve tesellüm eyledikden sonra meblağ-ı mezbûrdan yüz akçesini mukaddemâ ahz ü kabz edip meblağ-ı bâkī bin dokuz yüz akçe zimmetinde kalıp hattâ meblağ-ı mezbûru benden karz ahzını şuhûd mahzarında ikrâr dahi etmişdir suâl olunup alıverilmesi matlûbumdur dedikde gıbbe’s-suâl mezbûr İbrahim Reis cevâbında fi’l-vâki‘ müdde‘î-i mezbûrdan iki bin akçe mudârebeten ahz ü kabz eyledim deyû ikrâr-ı karz ahzını inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup zikr olunan odalar sükkânından Hüseyin b. Ali ve Şahin b. Abdullah nâm kimesneler li ecli’ş-şehâde meclis-i şer‘a hâzırân olup isre’l-istintâk fi’l-vâki‘ mezbûr İbrahim Reis bizim huzûrumuzda merkūm Ali Beşe’den meblağ-ı mezbûr iki bin akçeyi bi tarîki’l-karz ahz ü kabz eyledim deyû ikrâr ve bizi işhâd eyledi. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde şehâdetleri hayyiz-i kabûlde vâkı‘a olmağın mûcebiyle meblağ-ı mezbûr bin dokuz yüz akçenin edâsına merkūm İbrahim Reis’e tenbîh birle mâ vaka‘a bi’t-taleb ketb olundu. Fî 4 Şevvâl sene 1073 Şuhûdü’l-hâl: Mustafa Çelebi [b.] Receb, Musa [b.] Receb, Hüseyin [b.] Abdullah, Siyavuş [b.] Abdullah.