Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 165 Hüküm no: 178 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdurrahman’ın İvaz’ı omuzundan yaraladığına şahitlik edilmesi Vilâyet-i Anadolu’da Giresun nâm kasaba mahallâtından el-Hâc Hüseyin mahallesinde sâkin İvaz b. ( ) nâm kimesne tarafından husûs-ı âti’l-beyânı da‘vâya vekîl olup hasm-ı şer‘î-i câhid mahzarında mahalle-i mezbûre ahâlîsinden es-Seyyid Mustafa Çelebi b. el-Hâc Mehmed ve es-Seyyid Osman Çelebi b. el-Hâc Ömer nâm kimesneler şehâdetleri ile şer‘an vekâleti sâbite olan işbu râfi‘ü’l-kitâb Hasan Beşe b. Osman nâm kimesne meclis-i şer‘-i hatîr-i lâzımü’t-tevkīrde yine mahalle-i mezkûre sükkânından Ali b. Abdurrahman nâm kimesne mahzarında bi’l-vekâle üzerine da‘vâ ve takrîr-i kelâm edip târih-i kitâbdan otuz sekiz gün mukaddem mezbûr Ali mahalle-i merkūmede müvekkilim mezbûr İvaz’ın sağ omuzu üzerinde iki yerde bıçak ile vurup mecrûh eylemişdir hâlâ mezbûrdan suâl olunup mûceb-i şer‘îsi icrâ olunmak bi’l-vekâle matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahalle-i mezbûre ahâlîsinden es-Seyyid Mustafa Çelebi b. es-Seyyid Habib ve es-Seyyid Yahya Çelebi b. es-Seyyid Mehmed Efendi nâm kimesneler li ecli’ş-şehâde meclis-i şer‘a hâzırân olup isre’l-istişhâd ve fi’l-vâki‘ târih-i mezkûrda mahalle-i merkūmede mezbûr Ali müvekkil-i mersûm İvaz’ın sağ omuzu üzerinde iki yerde bıçak ile bizim huzûrumuzda vurup mecrûh eyledi. biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyete şerâiti’l-kabûl şehâdetleri hayyiz-i kabûlde vâkı‘a olmağın mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min Şevvâli’l-mükerrem li sene selâse ve seb‘în ve elf Şuhûdü’l-hâl: Es-Seyyid Mehmed Efendi b. es-Seyyid Yahya, es-Seyyid Mustafa Çelebi b. es-Seyyid Mehmed Efendi, Eyüb Bey b. Ser-muhzırân, Muharrem b. Receb, Mustafa Çelebi b. Receb, Musa b. Receb ve gayruhüm mine’l-huzzâr.