Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 181 Hüküm no: 201 Orijinal metin no: [26b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Canıta v. Kostantin’in Duka Reis v. Preşkova’daki ziyade alacak iddiasını ispat için vakit istemesi Mellâh tâifesinden işbu hâmilü’s-sifr Duka Reis v. Preşkova nâm zimmî mahfil-i kazâda Canıta v. Kostantin nâm zimmî muvâcehesinde üzerine da‘vâ ve takrîr-i kelâm edip merkūm Canıta’nın cihet-i karz-ı şer‘îden zimmetimde iki yüz yirmi esedî guruş hakkı olmağla meblağ-ı mezbûrun iki yüz esedî guruşu mukaddemâ yedimden ahz ü kabz edip bâkī yirmi esedî guruşdan zimmetimi ibrâ eyledikden sonra merkūm benden ziyâde kırk esedî guruş ahz etmişdir hâlâ ziyâde kabz eylediği meblağ-ı merkūm mezbûrdan istirdâd ve taleb ederim suâl olunsun dedikde gıbbe’s-suâl merkūm Canıta cevâbında fi’l-hakīka mezbûr Duka Reis’in vech-i muharrer üzre zimmetinde bana deyni olan iki yüz yirmi guruş hakkımın iki yüz esedî guruşunu mukaddemâ yedinden ahz ü kabz edip bâkī yirmi esedî guruşdan dahi merkūmun zimmetini ibrâ ve iskāt eylediğimden mâ‘adâ kırk esedî guruş dahi ahz ü kabz eylemişidim lâkin sâlifü’z-zikr iki yüz yirmi esedî guruşdan gayrı merkūm Duka Reis’in zimmetinde seksen esedî guruş hakkım olmağla meblağ-ı mezbûrun mukaddemâ kırk esedî guruşunu yedinden ahz ve istîfâ edip kırk esedî guruş hakkım merkūm Duka Reis’in zimmetinde bâkī kalmağın makbûzum olan meblağ-ı merkūm kırk esedî guruşu müdde‘î-i mezbûrun yedinden hakkım olan meblağ-ı bâkī kırk esedî guruş mukābelesinde ahz ü kabz etmişdir deyicek gıbbe’l-istintâk müdde‘î-i mezbûr Duka Reis mezbûr Canıta’ya vech-i muharrer üzre an asl seksen esedî guruş deyni olduğunu münkir olucak merkūm Canıta’dan müdde‘âsını mübeyyine beyyine taleb olundukda ityân-ı beyyine için istimhâl etmeğin mehl-i şer‘î ile imhâl olunup mâ vaka‘a bi’t-taleb ketb olundu. Hurrire fi’l-yevmi’l-âşir min Şevvâli’l-mükerrem li sene selâse ve seb‘în ve elf Şuhûdü’l-hâl: Mahmud Çavuş b. Mehmed el-Mübâşir, Mustafa Çelebi b. Receb, Muharrem b. Receb, Ali Beşe b. Musli, Ahmed Yazıcı b. Mehmed, el-Hâc Kenan b. Abdullah, çukadâr Ebûbekir Beşe b. Musli, Musa b. Receb, Zülfikār b. İbrahim.