Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 281 Hüküm no: 348 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Murtaza b. Ebûbekir’in kölesi Mustafa’yı azat etmesi Medîne-i Sinop sükkânından olup hâlâ mahmiye-i Galata’da tüccâr tâifesinden olup ticâret tarîki ile mütemekkin olan el-Hâc Murtaza b. Ebûbekir tarafından i‘tâk-ı âti’l-beyânı ikrâra vekîl olup Mustafa b. Ahmed ve ( ) b. Hüseyin nâm kimesneler şehâdetleri ile şer‘an vekâleti sâbite olan Mehmed Çelebi b. ( ) mahfil-i kazâda müvekkil-i mezbûra rıkkını mu‘terif olan işbu uzun boylu kara gözlü, açık kaşlı Giridiyyü’l-asl râfi‘-i hâze’l-kitâb Mustafa b. Abdullah nâm gulâm mahzarında bi’l-vekâle ikrâr ve takrîr-i kelâm edip mezbûr el-Hâc Mustafa abd-i memlûkü olan mevsûf-ı mezbûru hasbeten lillâhi te‘âlâ ve taleben li merzâtihî malından tahrîr ve i‘tâk ve mezbûru ahrâr-ı asliyyîne idrâc ve ilhâk eyledim ba‘de’l-yevm mevsûf-ı merkūm Mustafa sâir ahrâr-ı asliyyîn gibi hür olup üzerinde müvekkilemin velâdan gayrı hakkı kalmamışdır dedikde mâ vaka‘a bi’t-taleb ketb olundu. Fi’l-yevmi’l-hâmis aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Hayreddin Yazıcı b. Mehmed, Ahmed Yazıcı b. Mehmed, Topal Abdi b. ( ), Mustafa b. Receb ve gayruhüm.