Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 281 Hüküm no: 347 Orijinal metin no: [48b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mimar Mustafa Ağa’nın mülk arsasını Mahmud Ağa’ya satması Mahmiye-i İstanbul’da Gül Câmi‘i mahallesinde sâkin iftihârü’l-emâcid ve’l-ekârim hâlâ Mi‘mâr Mustafa Ağa b. İbrahim tarafından bey‘-i âti’l-beyânı ikrâra vekîl olup hasm-ı şer‘î-i câhid mahzarında Ali Bey b. İbrahim ve el-Hâc İbrahim Çelebi b. Ali nâm kimesneler şehâdetleri ile şer‘an vekâleti sâbite olan Mehmed Çelebi b. Mustafa meclis-i şer‘-i hatîr-i lâzımü’t-tevkīrde işbu râfi‘ü’l-kitâb fahrü’l-a‘yân Mahmud Ağa b. Hüseyin muvâcehesinde bi’l-vekâle ikrâr ve takrîr-i kelâm edip müvekkil-i müşârün-ileyh Mustafa Ağa silk-i mülkünde münselik olup mahmiye-i Galata’da Sultan Bayezid mahallesinde vâki‘ bir tarafdan ba‘zan Yamandi [49a] ve ba‘zan Kılıç Ali Paşa mülküne ve Cezerî Kasım Paşa vakıfları ve üç tarafdan tarîk-i âm ile mahdûd olan mülk arsa-i hâliyesini merkūm el-Hâc Mahmud Ağa’ya fıddî râyic fi’l-vakt otuz bir bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl ettikden sonra semeni olan meblağ-ı mezbûr otuz bir bin akçeyi müvekkil-i müşârün-ileyh Mustafa Ağa mezbûr el-Hâc Mahmud Ağa’nın yedinden tamâmen ahz ü kabz eyledi ba‘de’l-yevm zikr olunan arsa-i mahdûde-i mezkûre mezbûr el-Hâc Mahmud Ağa’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’l-hâmis aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Fahrü’l-kuzât Nasuh Efendi b. Yusuf, fahrü’l-müderrisîn Abdülkerim [b.] Mehmed Efendi, Muhzırbaşı Eyüb Ağa, Mustafa b. Receb.