Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 282 Hüküm no: 350 Orijinal metin no: [49a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerbetçi esnafından İplan v. İplan kendi işiyle meşgul olup şişeci esnafının işlerine müdahale etmemesi Mahmiye-i Galata’da şişeci tâifesinden Yorgi v. Mihal, Manol v. Cani ve Mihal v. Siro, İlya v. Nikola ve Mihal v. Pandeli ve Pandeli v. Mihal ve sâirleri mahfil-i kazâda İplan v. İplan nâm zimmî muvâcehesinde her biri üzerine da‘vâ ve takrîr-i kelâm edip mezbûr İplan bundan akdem şerbetçi olup kendi san‘atları olan şerbetçiliği işlemeyip bizim san‘atımıza müdâhale edegelmiş değiller iken rızâmız yoğiken dükkânımız civârında şişeci dükkânı açıp ihdâs eylediğinden mâ‘adâ taraf-ı saltanat-ı aliyyeden vâki‘ tekâlîfde bize muhâlefet edip mütâbe‘at etmemekle bize küllî zararı vardır hâlâ mezbûr İplan’dan suâl olunup kadîmden işleyigeldiği san‘atını işleyip san‘atımıza müdâhale etmemek üzre mezbûr İplan’a tenbîh olunmak matlûbumuzdur dediklerinde gıbbe’s-suâl mezbûr İplan cevâbında fi’l-hakīka hâl bast olunan minvâl-i muharrer üzre olmuşdur deyû ikrâr ve i‘tirâf etmesiyle kadîmden [49b] işleyigeldiği şerbetçilik san‘atını işleyip min ba‘d mezbûrûnun san‘atına müdâhale etmemek üzre merkūm İplan’a tenbîh olunup mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Muhzırbaşı Eyüb Ağa el-Bevvâbü’s-sultânî, Mustafa b. Receb, Âbidin b. Mustafa, Mustafa b. Emrullah ve gayruhüm.