Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 283 Hüküm no: 351 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Yahya’nın evini bütün müştemilatıyla beraber el-Hâc Receb’e satması Mahrûsa-i Galata’ya tâbi‘ kasaba-i Kasımpaşa mahallâtından el-Hâc Ahmed mahallesinde sâkin Mustafa Beşe b. Yahya nâm kimesneye mahfil-i kazâda mahalle-i merkūmede sâkin işbu râfi‘ü’l-vesîka el-Hâc Receb nâm kimesne tarafından menzil-i âti’z-zikri iştirâ ve def‘-i semene vekîl olup mahzar-ı hasm-ı câhidde şer‘an vekâleti sâbite olan Mahmud Efendi b. el-Hâc Mehmed ve Veli Beşe b. Hasan ve Mehmed Bey b. Durak nâm kimesneler şehâdetleri ile şer‘an vekâleti sâbite olan Ömer Bey b. Mehmed nâm kimesne mahzarında ikrâr ve takrîr-i kelâm edip silk-i mülkümde münselik olup mukaddemâ el-Hâc Muharrem nâm kimesneden iştirâ eylediğim menzil mahalle-i merkūmede vâki‘ bir tarafdan el-Hâc Ahmed vakfı ve bir tarafdan imâma meşrûta menzil ve ba‘zan Emine Hâtun ve ba‘zan bâyi‘-i merkūm mülkleri ve iki tarafdan tarîk-i âm ile mahdûd bir bâb fevkānî ve bir bâb tahtânî odaları ve iki ahûru ve bir süd ahûru ve bi’r-i mâ ve kenîfi ve havluyu ve zât-ı eşcâr-ı müsmire ve gayr-ı müsmireyi müştemil mülk menzilimi bi cümleti’t-tevâbi‘ ve’l-levâhık elli beş bin fıddî râyic fi’l-vakt akçeye tarafeynden mezbûr el-Hâc Receb’e îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve kabz ve tesellüm eyledikden sonra semeni olan meblağ-ı merkūmu vekîl-i mezbûr yedinden bi’t-tamâm ve’l-kemâl ahz ü kabz edip ba‘de’l-yevm menzil-i mahdûd-ı mezkûr müvekkil-i mezbûr el-Hâc Receb’in mülk-i müşterâsıdır, keyfe mâ yeşâ’ ve yahtâr mutasarrıf olsun dedikde mâ vaka‘a bi’t-taleb ketb olundu. Fi’l-yevmi’s-sâbi‘ aşer min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Hasan Efendi b. Şaban el-İmâm, Hüseyin b. Receb, Hasan Çelebi b. Ahmed el-Müezzin, Halil Ağa b. İdris, İsmail Çelebi b. Hasan ve gayruhüm.