Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 298 Hüküm no: 371 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed oğlu Hüseyin, Ahmed ile anneleri Fâtıma ile Süleyman b. Ömer arasında karşılıklı olarak ev satışı Mahmiye-i Galata’da Yolcuzâde mahallesinde sâkin Hüseyin ve Ahmed ibney Mehmed nâm kimesneler ile vâlideleri Fâtıma bt. Ahmed nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb el-Hâc Süleyman b. Ömer nâm kimesne mahzarında her biri ikrâr ve takrîr-i kelâm edip babamız mezbûr Mehmed’den bizim ile vâlidemiz mezbûre Fâtıma Hâtun’a irs-i şer‘î ile intikāl edip mahalle-i mezbûrede vâki‘ bir tarafdan Mehmed Çelebi mülkü ve bir tarafdan Mustafa mülkü ve bir tarafdan mahalle-i mezbûre imâmına meşrûta vakıf menzil ve bir tarafdan tarîk-i âm ile mahdûd iki bâb fevkānî ve bir bâb tahtânî beyt ve bi’r-i mâ’ ve muhavvatayı müştemil olan mülk menzilimizi mezbûr el-Hâc Süleyman’a bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık yetmiş bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr yetmiş bin akçenin elli bin akçesini yedinden nakden ahz ü kabz edip semen-i bâkī yirmi bin akçe mukābelesinde Medîne-i münevvere -alâ münevvirihâ efdalü’t-tahiyye- evkāfından icâre-i mu‘accele ve ücret-i müeccele-i ma‘lûme ile taht-ı tasarrufunda olup ve yine mahalle-i mezbûrede vâki‘ bir tarafdan Hüseyin Beşe veresesi mülkü ve bir tarafdan Hatice Hâtun mülkü ve bir tarafdan ( ) mülkü ve bir tarafdan tarîk-i âm ile mahdûd iki bâb fevkānî odaları ma‘rifet-i mütevellî ile yirmi bin akçe bedel mukābelesinde üçümüze ale’l-iştirâki’s-seviy ferâğ ve tefvîz, biz dahi vech-i muharrer üzre tefevvuz ve kabûl eyledikden sonra mezbûr el-Hâc Süleyman bedel-i ferâğ olan meblağ-ı mezbûr yirmi bin akçeyi menzil-i mezbûrun semeninden bâkī yirmi bin akçeye takās edip biz dahi vech-i muharrer üzre mukāssa ve kabûl eyledik ba‘de’l-yevm menzil-i mahdûd-ı mezkûr mezbûr el-Hâc Süleyman’ın mülk-i müşterâsıdır, keyfe mâ yeşâ’ ve yahtâr mutasarrıf olsun dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâlis ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Musa Efendi b. Mehmed el-İmâm, Halil Ağa b. Mustafa el-Cündî, el-Hâc Mustafa b. Bayram Kapudân, el-Hâc Ahmed [b.] Kasım, el-Hâc Selim b. Mehmed, Musa Reis b. Mehmed, Nasuh b. Yusuf el-Kadı, İbrahim b. Mustafa, Mustafa b. Receb.