Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 299 Hüküm no: 372 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Toma’nın evinin arsasını gasbeden Dimitri v. Yani’nin arsayı sahibine teslim etmesi Husûs-ı âti’l-beyânın mahallinde tahrîri iltimâs olunmağın savb-ı şer‘den mevlânâ Hasan Efendi b. Hüsameddin irsâl olunup ol dahi hâssa mi‘mârlarından üstâd Şaban b. Veli ve zeyl-i kitâbda mastûrü’l-esâmî olan müslimîn ile mahmiye-i Galata’da Beyzâde mahallesinde vâki‘ merhûm Hüseyin Ağa vakfı’ndan olup icâre-i mu‘accele ile Yani v. Toma nâm zimmînin mutasarrıf olduğu vakıf menzile varıp akd-i meclis-i şer‘-i hatîr eyledikde, işbu râfi‘ü’s-sifr merkūm Yani meclis-i ma‘kūd-ı mezbûrda câr-ı mülâsıkı olup arsa-i âti’z-zikre vâzı‘ü’l-yed olan Dimitri v. Yani nâm zimmî muvâcehesinde üzerine da‘vâ ve takrîr-i kelâm edip menzil-i mezbûrun cânib-i garbîsinde vâki‘ mi‘mâr-ı mezbûr mesâhası üzre tûlen sekiz zirâ‘ ve arzan <> bir buçuk zirâ‘ bi hesâb-ı şatrancî on iki zirâ‘ arsaya hâlâ mutasarrıf olduğum menzil-i mevkūf-ı mezbûrun arsasından ve mülhakātından iken mezbûr Dimitri arsa-i mezkûreye bi gayr-ı vech-i şer‘î vaz‘-ı yed edip üzerine binâ ihdâs etmek murâd eder, suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Dimitri cevâbında arsa-i mahdûde-i mezkûre müdde‘î-i mezbûrun mutasarrıf olduğu menzil-i mevkūf-ı mezbûrun mülhakātından olup fuzûlen vaz‘-ı yed ve tasarruf eylediğini bi tav‘ihî ikrâr ve i‘tirâf etmeğin mûcebiyle arsa-i mezkûreden mezbûr Dimitri’nin kasr-ı yedine tenbîh olunduğun mevlânâ-yı mezbûr mahallinde tahrîr ba‘dehû ma‘an irsâl olunan Mustafa Çelebi b. Receb ile Meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: İbrahim Ağa b. Hızır el-Mütevellî-i vakf-ı mezbûr, Ahmed Çelebi b. Mehmed el-Câbi-i vakf-ı mezbûr, üstâd Mehmed Halîfe el-Mi‘mâr, Halil Çelebi b. Ali, Mehmed Çelebi b. Ahmed ve gayruhüm.