Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 306 Hüküm no: 381 Orijinal metin no: [56a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saatçi Bayram’ın Hacı Mehmed b. Abdullah’a borcu olduğu Hallâk tâifesinden işbu râfi‘ü’l-kitâb el-Hâc Mehmed b. Abdullah nâm kimesne meclis-i şer‘-i hatîr-i lâzımü’t-tevkīrde sâ‘atçi tâifesinden Bayram [b.] Abdullah nâm kimesne mahzarında üzerine da‘vâ ve takrîr-i kelâm edip bundan akdem mezbûr Bayram zimmetinde cihet-i karz-ı şer‘îden elli beş kıt‘a riyâlî guruş hakkım vardır ve taleb ederim, suâl olunsun dedikde gıbbe’s-suâl mezbûr Bayram cevâbında fi’l-hakīka müdde‘î-i mezbûr el-Hâc Mehmed’e cihet-i karz-ı şer‘îden zimmetimde vâcibü’l-kazâ ve lâzımü’l-edâ elli beş kıt‘a riyâlî guruş deynim vardır deyû bi tav‘ihî ikrâr ve i‘tirâf edip alâ mûceb-i i‘tirâfihî meblağ-ı mezbûru müdde‘î-i mezbûra edâya merkūm Bayram’a tenbîh birle mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: El-Hâc Kenan b. Abdullah, Ahmed Yazıcı b. Mehmed, Mustafa b. Receb, Ebûbekir Beşe b. Şaban ve gayruhüm.