Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 306 Hüküm no: 382 Orijinal metin no: [56a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Toros v. Ovannes’in ev ve harman yerini Haçador ve Yakob’a sattığı Vilâyet-i Anadolu’da Divriği kazâsına tâbi‘ Pengan nâm karye sâkinlerinden Toros v. Ovannes nâm Ermeni meclis-i şer‘-i şerîf-i lâzımü’t-tevkīrde işbu râfi‘ayi’s-sifr Haçador ve Yakob veledey Asvador muvâcehesinde bi’t-tav‘i’s-sâf ikrâr ve i‘tirâf edip silk-i mülkümde münselik olup karye-i mezbûrede vâki‘ bir tarafdan Maço mülküne ve iki tarafdan dağ ve bir tarafdan harman yeri ile mahdûd bir bâb tahtânî ve bir bâb fevkānî menzil ve çardak ve yine karye-i mezbûre kurbunda vâki‘ lede’l-ahâlî ve’l-cîrân ma‘lûmü’l-hudûd bostanımı muhtevî mülk menzilimi merkūmân Haçador ve Yakob’a ale’l-iştirâki’s-seviy her bir guruş dokuzar dirhem olmak üzre yüz kıt‘a riyâlî guruşa bey‘-i bâtt-ı sahîh-i şer‘î ile bey‘ ve temlîk edip anlar dahi vech-i muharrer üzre iştirâ ve tesellüm ve kabûl ve temellük ettikden sonra semeni olan meblağ-ı mezbûr yüz kıt‘a riyâlî guruşu mezbûrân Haçador ve Yakob yedlerinden tamâmen ahz ü kabz eyledim ba‘de’l-yevm hudûd-ı mezkûr ile mahdûd olan menzil ve harman yerimi mahallinde zabt ve tasarrufa mezbûrân Haçador ve Yagob’u taslît eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâlis ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Mehmed Çelebi b. Osman, Ahmed Çelebi b. Musa, Vartan v. Yani, Gazer v. Angel, Bogos v. Mihran, Asvador v. Vartan ve gayruhüm.