Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 721 Hüküm no: 932 Orijinal metin no: [111a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Süleyman’ın, evini Ahmed Ağa b. Abdülmennân’a sattığı ve satış bedelinin bir kısmını borcuna takas ettiği Mahmiye-i İstanbul’da Kabasakal Sinan mahallesi sükkânından Ağrıbozlu demekle ma‘rûf Mehmed Ağa b. Süleyman nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de dergâh-ı âlî kapıcıbaşılarından olup kendi vakfına mütevellî olan umdetü’l-emâsil ve’l-a‘yân Ahmed Ağa b. Abdülmennân’ın oğlu ve tarafından husûs-ı âti’l-beyâna vekîl olduğu Mehmed Ağa b. Abdünnebi ve Ahmed Ağa b. Pervâne nâm kimesneler şehâdetleri ile sâbit olan Mehmed Bey b. ( ) mahzarında ikrâr ve takrîr-i kelâm edip akd-i âtînin sudûruna değin yedimde mülküm ve hakkım olup mahalle-i mezbûrda vâki‘ bir tarafdan Siyavuş Hâtun bt. Abdullah mülkü ve bir tarafdan Osman Çelebi b. Süleyman menzili ve bir tarafdan Ali Efendi menzili ve bir tarafdan tarîk-i âm ile mahdûd hâricen ve dâhilen fevkānî ve tahtânî büyût-ı adîde ve ahır ve su kuyusu ve kenîfi müştemil menzilimi vekîl-i mezbûr Mehmed Bey’e tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin yüz altmış yedi buçuk esedî guruşa bey‘ ve teslîm edip ol dahi müvekkili için iştirâ ve tesellüm ettiğinden sonra semen-i mezbûrun altı yüz esedî guruşunu mezbûr [111b] Mehmed Bey yedinden ahz u kabz edip bâkī beş yüz altmış yedi buçuk esedî guruşunu vakf-ı mezbûra cihet-i deyn-i şer‘îden zimmetimde vâcibü’l-edâ ve lâzımü’l-kazâ deynim olan beş yüz altmış yedi buçuk esedî guruşa takās edip ol dahi mukāssa ve kabûl etmekle semen-i mezbûru tamâmen ahz ve istîfâ eyledim min ba‘d menzil-i mezbûr müvekkil-i mezbûrun mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Hasan Ağa b. Mustafa, Şükrullah Bey b. Mustafa, Mehmed Efendi b. Ahmed imâm, Yusuf Çavuş [b.] Abdullah, Ebûbekir Ağa b. Abdullah, Mustafa Efendi [b.] Abdullah.