Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 308 Hüküm no: 384 Orijinal metin no: [56b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Abdüsselâm’ın Ali Reis’de kalan parası ve sair hizmetlerden dolayı olan alacağı hususundaki davada sulh sağlandığı Mellâh tâifesinden olup hâlâ mahmiye-i Galata’da Câmi‘-i Kebîr mahallesinde sâkin olan el-Hâc Abdüsselâm b. Mehmed nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ali Reis b. el-Hâc Mehmed nâm kimesne mahzarında ikrâr ve takrîr-i kelâm edip bundan akdem mezbûr Ali Reis’e iki yüz yirmi kıt‘a esedî guruş ikrâz ve teslîm edip ol dahi istikrâz ve yedimden kabz eyledikden sonra meblağ-ı mezbûrun yüz esedî guruşunu yazıcısı olup işbu hâzır bi’l-meclis olan el-Hâc Yusuf yedinden yüz yirmi esedî guruşunu dahi târih-i kitâb günü kendi yedinden ki cem‘an iki yüz yirmi esedî guruşu tamâmen ahz ü kabz eylediğimden sonra def‘a mezbûr Ali Reis zimmetinde cihet-i karz-ı şer‘îden on guruş ve Mısır’a varıp gelince sefînesinde ettiğim hizmetim mukābelesinde ücret-i müsemmâmdan otuz guruş ve Mısır’da kendiye def‘ ve teslîm eylediğim bir kantar sükker kıymetinden dahi otuz guruş ki cem‘an yetmiş kıt‘a esedî guruş hakkım vardır deyû meblağ-ı mezbûru mezbûrdan da‘vâ ve taleb eylediğimde beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî vesâtat-ı muslihîn ile meblağ-ı mezbûr yetmiş guruş da‘vâsından mezbûr Ali Reis [ile] beni kırk beş kıt‘a esedî guruş üzerine sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr kırk beş guruşu yedinden tamâmen ahz ü kabz edip mâ‘adâ da‘vâsından târih-i kitâba gelinceye değin beynimizde vâki‘ olan mu‘âmelât-ı şettâya müte‘allika âmme-i de‘âvî [ve] mütâlebâtdan mezbûr Ali Reis’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d meblağ-ı mezbûr iki yüz yirmi esedî guruşdan mezbûrun zimmetinde bir akçe ve bir habbe hakkım bâkī kalmadı ve meblağ-ı mezbûr yetmiş guruşa müte‘allika dahi vechen mine’l- vücûh mezbûr ile da‘vâ ve nizâ‘ım yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Es-Seyyid Mehmed Çelebi b. es-Seyyid Hüseyin, es-Seyyid Mehmed Çelebi b. Hasan, el-Hâc Mehmed b. el-Hâc Ahmed, Mehmed b. Mehmed, Kasım b. İbrahim Ağa.