Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 307 Hüküm no: 383 Orijinal metin no: [56a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Silahdar Mustafa Paşa Vakfı mütevellisi Ahmed Çelebi b. Hüseyin’in vakfa olan borca kefil olan Preşkova v. Yorgi ve Todori v. Mihal’den alacağını tahsil etmesi Mahrûsa-i Galata hâricinde vâki‘ Saray-ı sultânîde merhûm Silahdar Mustafa Paşa vakf eylediği nukūda bi’l-fi‘l mütevellî olan bâ‘isü hâze’l-kitâb Ahmed Çelebi b. Hüseyin mahfil-i kazâda mahrûsa-i mezbûre dâhilinde Sultan Bayezid mahallesi sâkinlerinden Preşkova v. Yorgi ve Todori v. Mihal nâm zimmîler muvâcehelerinde üzerlerine bi’t-tevliyye da‘vâ ve takrîr-i kelâm edip mahalle-i mezbûrede sâkin iken bundan akdem hâlik olan Palaş v. Todori nâm zimmî kemâl-i sıhhatinde iken zevcesi işbu hâzıra bi’l-meclis Marya bt. Panayot nâm nasrâniye ile mahalle-i mezbûrede vâki‘ bir tarafdan Angelye ( ) nâm nasrâniye mülkü ve bir tarafdan merhûm Kasım Ağa vakfı ve bir tarafdan cidâr-ı hısn ve bir tarafdan tarîk-i âm ile mahdûd [56b] iştirâk-i seviy üzre olan mülk menzili târih-i kitâbdan bir sene mukaddem cânib-i vakf-ı mezbûra her biri yedişer buçuk dirhem olmak üzre üç yüz kıt‘a riyâlî guruş ile bi tarîki’l-istiğlâl bey‘ ve teslîm, ben dahi vech-i muharrer üzre iştirâ ve tesellüm ve kabûl eyledikden sonra yine menzil-i mezbûru ba‘de’t-tahliyye ve’l-kabz târih-i mezbûrdan bir sene tamâmına değin otuz yedi buçuk kıt‘a merkūmü’l-vasf guruş ücret ile mezbûrâna îcâr, anlar dahi vech-i meşrûh üzre ücret-i merkūm ile benden istîcâr eylediklerinden sonra merkūmân Preşkova ve Todori ücret-i mezbûreye ikisi ma‘an emr ve kabûlü hâvî kefâlet ile kefîl olmağla hâlâ ücret-i menzil olan meblağ-ı mezbûru merkūmândan taleb ederim, suâl olunup alıverilmesi matlûbumdur dedikde gıbbe’s-suâl merkūmân Preşkova ve Todori cevâblarında fi’l-vâki‘ menzil-i mezbûrun bir senelik ücreti olan otuz yedi buçuk kıt‘a riyâlî guruşa emr ve kabûlü hâviye kefâlet-i sahîha-i şer‘iyye ile ikimiz ma‘an kefîl olduk deyû her biri ikrâr ve i‘tirâf etmeğin meblağ-ı mezbûru mütevellî-i mersûma edâya teslîme zimmiyân-ı merkūmâna tenbîh birle mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Mustafa Çelebi b. Receb, Ahmed Yazıcı b. Mehmed, Âbidin b. Mustafa, Emrullah b. Mehmed, Muharrem b. Receb ve gayruhüm.