Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 309 Hüküm no: 386 Orijinal metin no: [57a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Sife’nin varislerinin miras malı konusundaki davalarında sulh sağladığı Mahmiye-i Galata müzâfâtından Yeniköy nâm karye sâkinelerinden olup bundan akdem hâlike olan Sife bt. ( ) nâm nasrâniyenin verâseti zevc-i metrûkü Yanaki v. Karanfil nâm zimmî ile li ebevyen er karındaşı Sava ve kız karındaşı Elena’ya münhasıra olduğu şer‘an zâhir ve mütehakkik oldukdan sonra mezbûr Sava kendi tarafından asâleten ve mezbûre Elena’nın tarafından sulh ve ibrâ-i âti’l-beyânı ikrâra vekîl olup hasm-ı şer‘î-i câhid mahzarında mezbûreyi ma‘rifet-i şer‘iyye ile ârifân Rali v. Aleksandri ve Manol v. Aleksandri v. ( ) nâm zimmîler şehâdetleri ile şer‘an vekâleti sâbite olan Kiryako v. Yorgi nâm zimmî vekâleten meclis-i şer‘-i hatîr-i lâzımü’t-teşrîfde hâlike-i mezbûrenin muhallefâtına vâzı‘ü’l-yed olan bâ‘is-i hâze’s-sifr mezbûr Yanaki muvâcehesinde her biri ikrâr ve takrîr-i kelâm edip hâlike-i mezbûrenin mecmû‘ muhallefâtı yüz guruşa bâliğ olup merkūm Yanaki vaz‘-ı yed etmekle meblağ-ı mezbûrdan her birimiz hisse-i şer‘iyye-i ma‘lûmemizi asâleten ve vekâleten mezbûr Yanaki’den da‘vâ ve taleb eylediğimizde beynimizde münâza‘ât-ı kesîre cereyân etmişidi el-hâletü hâzihî vesâtat-ı muslihîn ile da‘vâ-yı mezkûrumdan mezkûr Yanaki bizi otuz kıt‘a esedî guruş üzerine sulh eylediklerinde biz dahi asâlet ve vekâletimiz hasebiyle meblağ-ı mezbûr otuz kıt‘a esedî guruşu mezbûr Yanaki yedinden tamâmen ahz ü kabz edip, mâ‘adâ da‘vâsından ve sâir hâlike-i mezbûrenin cemî‘ muhallefâtına müte‘allika âmme-i de‘âvîden mezbûr Yanaki’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dediklerinde ve min ba‘d husûs-ı mezbûra müte‘allika merkūm ile vechen mine’l-vücûh da‘vâ ve husûmetimiz yokdur dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Fahrü’l-eşbâh Alihan Çelebi b. Abdullah, fahrü’l-a‘yân Mehmed Çavuş el-Mübâşir, Süleyman b. Abdullah, Ahmed Yazıcı b. Mehmed, Hüseyin b. Abdullah, Ebûbekir b. Çukadâr.