Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 313 Hüküm no: 392 Orijinal metin no: [58a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Elizer v. İsak ve Baruh v. Salamon’un vefat eden Mihayilo v. Dimitri’de olan alacaklarını varislerinden tahsil ettikleri Edirne cemâ‘atinden Elizer v. İsak nâm yahudi tarafından meblağ-ı âti’l-beyânı ibrâya vekîl olup David v. Mosi nâm yahudi ile Zafiri v. Manol nâm zimmî şehâdetleri ile şer‘an vekâleti sâbite olan Baruh v. Salamon nâm yahudi mahfil-i kazâda medîne-i Üsküdar müzâfâtından Kızılada’ya tâbi‘ Yatmış nâm karyede sâkin iken bundan akdem hâlik olan Mihayilo v. Dimitri nâm zimmînin sulbî kebîr oğulları ve hasren vârisleri olan işbu râfi‘ayi’s-sifr Kostanti ve Yanbolino nâm zimmîler muvâcehelerinde bi’l-vekâle ikrâr ve takrîr-i kelâm edip bundan akdem müvekkilim mezbûr Elizer’in hâlik-i mezbûr Mihayilo zimmetinde cihet-i deyn-i şer‘îden üç yüz elli beş kıt‘a riyâlî guruş hakkı olup kable’l-edâ hâlik olmağla meblağ-ı mezbûr zimmetinde kalmışidi el-hâletü hâzihî merkūmân Kostantin ve Yanbolino’nun babaları hâlik-i mezbûrdan irs-i şer‘le intikāl edip karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzillerini yüz guruşa ve yine karye-i merkūmede vâki‘ inde’l-ahâlî ma‘lûmü’l-hudûd bir kıt‘a mülk bağlarını elli beş kıt‘a riyâlî guruşa ve yine hâlik-i mezbûrdan müntakil zarbana ta‘bîr olunur on yedi zirâ‘ kayıklarını dahi yüz kıt‘a riyâlî guruşa müvekkil-i mezbûr Elizer’e hakkı olan meblağ-ı mezbûr üç yüz elli beş kıt‘a riyâlî guruşun iki yüz elli beş guruş mukābelesinde kabûl eylediğinden sonra meblağ-ı bâkī yüz kıt‘a riyâlî guruşdan mezbûrân Kostantin ve Yanbolino’nun zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î vekîl-i mezbûr Baruh meclis-i şer‘de i‘âde-i kelâm edip benim dahi hâlik-i mezbûrun zimmetinde olan üç yüz elli beş kıt‘a riyâlî guruş hakkımı mezbûrân Kostantin ve Yanbolino’nun yedlerinden bi’t-tamâm ahz ü kabz eyledim. Meblağ-ı mezbûrdan merkūmân Kostantin ve Yanbolino’nun zimmetlerinde bir akçe ve bir habbe hakkım kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min Zilhicceti’ş-şerîfe li sene selâse ve seb‘în ve elf. Şuhûdü’l-hâl: El-Hâc Kenan b. Abdullah, Mustafa Çelebi b. Receb, Ebûbekir Beşe b. Fazlı, Mehmed Çelebi b. Hüseyin, Muharrem b. Receb ve gayruhüm.