Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 312 Hüküm no: 391 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Ali’nin bağını Yamandi v. Horende’ye sattığı Mahmiye-i Galata müzâfâtından Marmara nâhiyesine tâbi‘ Büyük nâm karye sâkinlerinden Mahmud b. Ali nâm kimesne mahfil-i kazâda bâ‘is-i hâze’s-sifr Yamandi v. Horende nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip karye-i mezbûre hudûdu dâhilinde Cehlî demekle ma‘rûf vâdide vâki‘ bir tarafdan Panayot bağı ve bir tarafdan Diryoni bağı ve iki tarafdan tarîk-i âm ile mahdûd tahmînen altı dönüm mülk bağımı mezbûr Yamandi’ye fıddî ve râyic fi’l-vakt dört yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk edip ol dahi vech-i muharrer üzre iştirâ ve temellük ve tesellüm ve kabûl eyledikden sonra semeni olan meblağ-ı mezbûr dört yüz akçeyi mezbûrun yedinden ahz ü kabz edip zikri sebk eden bağın mahallinde zabt ve tasarrufuna mezbûr Yamandi’yi taslît eyledim ba‘de’l-yevm benim alâka ve medhalim yokdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: Ebûbekir Beşe b. Şaban, Mustafa Çelebi b. Receb, Ali Çelebi b. Bâli, Mehmed Çelebi b. Bâli ve gayruhüm.