Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 314 Hüküm no: 394 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatib Mehmed Efendi’nin bedestendeki dolabından çalınan eşyaları dolayısıyla suçladığı kişilere yemin teklifi ve hırsızlık iddiasının reddi Mahmiye-i Galata’da Bereketzâde mahallesinde sâkin fahrü’l-hutebâ Mehmed Efendi b. Mehmed nâm kimesne mahfil-i kazâda mahmiye-i mezbûre Bezzâzistân müstahfızlarından ashâb-ı hâze’l-kitâb Mehmed b. Osman, el-Hâc Kenan b. Abdullah ve Veli b. İbrahim ve Ahmed b. Mehmed nâm kimesneler mahzarlarında üzerlerine da‘vâ ve takrîr-i kelâm edip bundan akdem zikr olunan Bezzâzistân’da vâki‘ mülk ve dolabıma vaz‘ eylediğim bir bohça içinde mevcûd bir tor kese ve üç sîm kuşak ve bir münakkaş yüz yastığı ve bir kaftan ve bir sîm bıçak ve bir sarı kaftan ve bir sîm bâfte ve bir saç bağı ayağı ve bir miskî kaftan zikr olunan dolabım açılıp içinde zâyi‘ olmağla hâlâ mezbûrûndan mazanna ittihâz eyledim. Beyyinem dahi olmamağla ba‘de’s-suâl tahlîf olmaları murâdımdır dedikde gıbbe’s-suâl husûs-ı mezbûru merkūmûn bi’l-külliyye inkâr eylediklerinde vech-i muharrer üzre zikr olunan dolabdan müdde‘î-i mezbûrun bir bohça içinde mevcûd bir tor kese ve üç sîm kuşak ve bir münakkaş yüz yastığı ve bir kaftan ve bir sîm bıçak ve bir sarı kaftan ve bir sîm bâfte ve bir saç bağı ayağı ve bir miskî kaftan ahz ü kabz etmediklerine mezbûrûn Mehmed ve el-Hâc Kenan ve Veli ve Ahmed’e yemîn teklîf olundukda onlar dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle mezbûr Mehmed Efendi mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Zilka‘deti’ş-şerîfe li sene selâse ve seb‘în ve elf. Şuhûdü’l-hâl: El-Hâc İbrahim b. Hüseyin, el-Hâc Mustafa b. Mehmed, Mehmed Çelebi b. el-Hâc Mustafa, el-Hâc Ali b. el-Hâc Mehmed, Osman b. Yusuf.