Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 317 Hüküm no: 398 Orijinal metin no: [59b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Memi’nin ev hissesini kardeşi Ali’ye sattığı Mahmiye-i Galata hâricinde Sarı Lütfi mahallesinde sâkin Ahmed Çelebi b. Memi nâm kimesne meclis-i şer‘-i hatîr-i lâzımü’t-tevkīrde karındaşı işbu bâ‘isü’l-kitâb Ali b. Memi nâm kimesne mahzarında ikrâr ve takrîr-i kelâm edip bundan akdem vâlidemiz olup müteveffât olan Hanife nâm hâtun[dan] ikimize irs-i şer‘î ile intikāl edip mahalle-i mezbûrede vâki‘ bir tarafdan kendi mülkümüz ve bir tarafdan mekābir-i müslimîn ve ba‘zan mahalle-i mezbûre mescidi ve ba‘zan yanımızda müşterek olan su yolu ile mahdûd ve iki bâb fevkānî ve iki bâb tahtânî odaları ve bi’r-i mâyı ve kenîfi ve zât-ı eşcâr-ı müsmire ve gayr-ı müsmireyi müştemil mülk menzilin nısf-ı şâyi‘i benim ve nısf-ı şâyi‘-i âharı mezbûr Ali’nin mülk-i mevrûsu [olup] hâlâ ben menzil-i mezkûrda olan nısf hisse-i şâyi‘a-i mezkûremi mezbûr Ali’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile dokuz bin fıddî râyic fi’l-vakt akçeye tarafeynden bey‘ ve teslîm ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr dokuz bin akçeyi yedinden bi’t-tamâm ve’l-kemâl ahz ü kabz edip ba‘de’l-yevm menzil-i mezbûrda olan nısf hisse-i şer‘iyye-i ma‘lûmem karındaşım mezbûr Ali’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa Efendi b. Receb, Müezzin Mehmed Çelebi, Hasanzâde Abdi, Sâlih Çelebi b. Mehmed, Mirza Beşe b. Mahmud ve gayruhüm.