Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 722 Hüküm no: 934 Orijinal metin no: [111b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kadı Ömer Efendi’nin, borcu için karısı Aliye Hatun’a ait evin rehin gösterildiği Mahmiye-i İstanbul’da Karagümrük kurbunda Molla Ahaveyn mahallesi sâkinlerinden olup bi’l-fi’l vilâyet-i Anadolu’da Bayramiç kadısı olan Ömer Efendi b. Ebûbekir ile zevce-i menkûhası Aliye Hâtun bt. Abdullah tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iyye ile ârifân Osman Beşe b. Mehmed ve Şaban b. Mustafa nâm kimesneler şehâdetleriyle lede’ş-şer‘i’l-mutahhar sâbit ve mukarrer olup mezbûr Ömer Efendi’nin sulbî oğlu olan Abdullah Çelebi nâm kimesne meclis-i şer‘-i şerîfde işbu bâ‘isü’l-kitâb Du‘âcızâde demekle şehîr Abdullah Çelebi b. Mustafa nâm kimesne mahzarında ikrâr ve takrîr-i kelâm edip babam ve müvekkilim mezbûr Ömer Efendi’nin merkūm Du‘âcızâde Abdullah Çelebi’ye cihet-i karz-ı şer‘îden üç yüz seksen kıt‘a esedî guruş ile yedinden müşterâ ve makbûz semen târih-i kitâbdan bir sene tamâmına değin müeccel ve mev‘ûd beynlerinde ma‘lûm bir re’s kır at semeninden yüz altmış esedî guruş cem‘an beş yüz kırk esedî guruş deyni olmağla müvekkilem mezbûre Aliye Hâtun’un mülkü olup mahalle-i mezbûrda vâki‘ bir tarafdan Mahmud Beşe mülkü ve bir tarafdan İsmail Ağa bostanı ve bir tarafdan Sipâhi Hâtun vakfı ve bir tarafdan tarîk-i âm ile mahdûd büyût-ı adîdeyi müştemil mülk menzilini müvekkile-i mezbûre rızâsıyla fâriğan ani’ş-şevâgil mezbûr Du‘âcızâde Abdullah Çelebi’ye deyn-i mezbûr mukābelesinde rehn vaz‘ ve teslîm edip ol dahi irtihân ve kabûl ve tesellüm eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li sene seb‘a ve seb‘în ve elf. Şuhûdü’l-hâl: Mustafa Efendi [b.] Şaban, Mustafa Ağa, Mahmud Çelebi b. ( ), el-Hâc Hızır.