Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 723 Hüküm no: 935 Orijinal metin no: [111b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kolo v. Lazka’nın alacak davasında sulh olup Nikola v. Liko’ya borcunu ödediği Meyhâneci tâifesinden Nikola v. Liko nâm zimmî meclis-i şer‘-i hatîr-i lâzımü’t-tevkīrde işbu bâ‘isü’s-sifr Kolo v. Lazka nâm zimmî muvâcehesinde üzerine da‘vâ ve takrîr-i kelâm edip merkūm Kolo zimmetinde cihet-i deyn-i şer‘îden on sekiz bin akçe hakkım olup meblağ-ı mezbûru merkūmdan da‘vâ ve taleb eylediğimde beynimizde münâza‘ât-ı kesîre vukū‘undan sonra beynimizde muslihûn tavassut edip meblağ-ı mezbûr da‘vâsından merkūm Kolo benimle üç bin iki yüz akçe üzerine [sulh olup ben dahi] sulh-i mezbûru kabûl etmişidim hâlâ bedel-i sulh olan meblağ-ı mezbûr üç bin iki yüz akçeyi mezbûr Kolo’dan taleb ederim suâl olunsun dedikde gıbbe’s-suâl merkūm Kolo cevâbında fi’l-vâki‘ kaziyye bâlâda tafsîli mürûr ettiği vech üzre olup lâkin bedel-i sulh olan meblağ-ı mezbûru merkūm Nikola tamâmen ahz u kabz edip hattâ vech-i meşrûh üzre meblağ-ı mezbûru ahz u kabz ettiğini huzûr-ı hâkimde ikrâr ve yedime hüccet-i şer‘iyye vermişidi deyicek gıbbe’s-suâl mezbûr Nikola fi’l-vâki‘ bedel-i sulh-i mezbûru tamâmen ahz u kabz eyledim deyû ikrâr ve huzûr-ı hâkimü’ş-şer‘de yedine hüccet-i şer‘iyye vermişdim lâkin vech-i meşrûh üzre olan ikrârımda kâzibim dedikde fi’l-vâki‘ vech-i meşrûh üzre olan ikrârında müdde‘î-i merkūm Nikola kâzib ve da‘vâsında mubtıl olmadığına merkūm Kolo’ya yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsa -aleyhisselâm- etmeğin mûcebince müdde‘î-i mezbûr bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Bey b. Abdullah, Abdi [b.] Hüseyin, Baba Resul b. Rıdvan, Süleyman Çelebi b. Mustafa, Mehmed b. Ramazan.