Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 322 Hüküm no: 406 Orijinal metin no: [60b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eleni bt. Petro’nun arsasını Kemal v. Yako’ya satması Mahmiye-i Galata’da Bereketzâde mahallesinde sâkine Eleni bt. Petro nâm nasrâniye mahfil-i kazâda Kesriye cemâ‘atinden Kemal v. Yako nâm yahudi muvâcehesinde ikrâr ve takrîr-i kelâm edip mahalle-i mezbûrede vâki‘ iki tarafı Ayasofya-i kebîr vakfı bir tarafı arz-ı hâliye bir tarafı tarîk-i âm ile mahdûd mülk arsa-i hâliye mezbûr Kemal’e sekiz bin nakd-i râyic fi’l-vakt akçeye tarafeynden îcâb ve kabûlü [hâvî] bey‘-i bâtt-ı sahîh-i şer‘î ile bey‘ ve teslîm, ol dahi vech-i muharrer üzre iştirâ ve tesellüm ve kabûl, semeni olan meblağ-ı mezbûru mezbûr Kemal yedinden alıp kabz eyledim ba‘de’l-yevm arsa-i mahdûd-ı mezkûr mezbûr Kemal’in mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb [olundu]. Fi’l-yevmi’s-sâbi‘ min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Kenan Bey b. Abdullah, Ebûbekir Beşe b. Şaban Çukadâr, Mustafa Çelebi b. Receb, Hüseyin b. Mirza, Ahmed Yazıcı b. Mehmed.