Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 323 Hüküm no: 409 Orijinal metin no: [61a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mahmud ve Mehmed b. Abdullah’ın Hacı Aşur aleyhindeki kayık satışı davasını ispatlayamadıkları Kayıkçı tâifesinden Mehmed b. Mahmud ve Mehmed b. Abdullah nâm kimesne mahfil-i kazâda tâife-i mezbûreden işbu râfi‘ü’l-kitâb el-Hâc Aşur b. el-Hâc Hatır nâm kimesne mahzarında üzerine her biri da‘vâ ve takrîr-i kelâm edip târih-i kitâbdan on iki gün mukaddem el-Hâc Aşur silk-i mülkünde münselik olan bir kayığını âlât-ı lâzımesiyle altı bin yedi yüz akçeye on beş gün tamâmına değin muhayyer olmak üzre ber vech-i iştirâk-i seviy bize bey‘ ve teslîm ve kabz-ı semen-i mezkûr etmeğin hâlâ hıyâr-ı şarta binâen zikr olunan kayık bâyi‘-i mezbûr[a] teslîm olunup ba‘de’s-suâl semen-i mezbûrun alıverilmesi murâdımdır dediklerinde gıbbe’s-suâl mezbûr el-Hâc Aşur cevâbında bey‘-i mezbûr bilâ-hıyâr olmuşdur deyû on beş gün muhayyer bey‘-i münkir olucak müdde‘iyân-ı mezbûrândan müdde‘âlarını mübeyyine beyyine taleb olundukda ityân-ı beyyineden izhâr-ı aczile istihlâf etmeğin sâlifü’z-zikr kayığı on beş gün muhayyer olmak üzre mezbûrâna bey‘ etmediğine merkūm el-Hâc Aşur’a yemîn teklîf olundukda ol dahi [alâ] hasebi’l-mes’ûl yemîn billâhi’l-aliyyi’l-a‘lâ etmeğin mûcebiyle müdde‘iyân-ı mezbûrân mütâlebeden men‘ birle mâ vaka‘a bi’t-taleb ketb olundu. Fi’l-yevmi’s-sâdis min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa b. Receb, Ahmed Yazıcı b. Mehmed, Emrullah b. Mehmed, Âbid b. Mustafa, Muharrem b. Receb ve gayruhüm.