Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 324 Hüküm no: 410 Orijinal metin no: [61a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Ali’nin vefat eden Osman’da olan alacağının terekesinden ödenmesi hususunda varislerden Mehmed’e tenbih olunduğu Mahmiye-i Galata müzâfâtından kasaba-i Fındıklı’da Kazancıbaşı mahallesinde sâkin bâ‘is-i hâze’l-kitâb Mustafa b. Ali nâm kimesne mahfil-i kazâda yine mahalle-i mezbûre sâkinlerinden olup bundan akdem vefât eden Osman nâm kimesnenin sulbî oğlu ve muhallefâtına vâzı‘ü’l-yed olan Mehmed nâm kimesne muvâcehesinde üzerine da‘vâ ve takrîr-i kelâm edip müteveffâ-yı mezbûr Osman zimmetinde cihet-i deyn-i şer‘îden elli guruş hakkım olup hattâ müteveffâ-yı mezbûr meblağ-ı merkūm vech-i muharrer üzre zimmetinde bana deyni olduğunu hâl-i hayâtında şuhûd mahzarında ikrâr dahi ettikden sonra meblağ-ı mezbûrun on buçuk guruşunu yedinden ahz ü kabz edip otuz yedi buçuk guruşunu kable’l-ahz fevt olmağla zimmetinde kalmışidi hâlâ meblağ-ı bâkīyi tereke-i vâfiyesinden olmak üzre mezbûr Mehmed’den taleb ederim, suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i ricâlden Receb b. Ali ve Ali b. Bâli nâm kimesneler li ecli’ş-şehâde meclis-i şer‘a hâzırân olup istişhâd olunduklarında isre’l-istişhâd fi’l-hakīka müteveffâ-yı mezbûr Osman hâl-i hayâtında müdde‘î-i mezbûr Mustafa’ya cihet-i mezbûrdan elli guruş zimmetinde vâcibü’l-edâ deynim vardır deyû bizim huzûrumuzda ikrâr edip bizi işhâd eyledi. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra meblağ-ı mezbûr on bir buçuk guruşdan ziyâde müteveffâ-yı mezbûrun hâl-i hayâtında küllen ve ba‘zan ahz u istîfâ veya hibe veya âhara havâle ve turuk-ı şer‘iyyeden bir tarîk ile müteveffâ-yı mezbûrun zimmetini ibrâ eylemediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle meblağ-ı bâkī otuz yedi buçuk guruşu mezbûr Mustafa’ya tereke-i müteveffâ-yı mezbûrdan edâ etmek üzre [61b] mezbûr Mehmed’e tenbîh birle mâ vaka‘a bi’t-taleb ketb olundu. Fi’l-yevmi’s-sâlis min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Eyüb Ağa el-Bevvâb-ı sultânî, Mustafa Çelebi b. Receb, Emrullah b. Mustafa, Muharrem b. Mustafa ve gayruhüm.