Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 325 Hüküm no: 412 Orijinal metin no: [61b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Dimo’ya ile Panayot v. Nikola arasındaki davada sulh olduğu halde borcun ödenmediğinin tespiti Mahmiye-i Galata hâricinde Beyoğlu mahallesinde sâkin bâ‘is-i hâze’s-sifr Nikola v. Dimo nâm zimmî meclis-i şer‘de Panayot v. Nikola nâm zimmî muvâcehesinde üzerine da‘vâ ve takrîr-i kelâm edip bundan akdem mezbûr Panayot mahalle-i mezbûrede vâki‘ inde’l-ahâlî ma‘lûmü’l-hudûd mülk menzilini bana hibe [ve] teslîm eylemişidi deyû mezbûr Panayot’dan da‘vâ ve taleb eylediğimde ol dahi inkâr etmekle beynimizde münâza‘ât-ı kesîre vâkı‘a oldukdan sonra vesâtat-ı muslihîn ile da‘vâ-yı mezkûrumdan merkūm Panayot beni dört bin akçe üzerine sulh eyledikde ben dahi sulh-i mezbûru kabûl etmişidim lâkin bedel-i sulh-i mezbûr merkūm Panayot zimmetinde bâkī kalmağla hâlâ meblağ-ı mezbûru merkūmdan taleb ederim, suâl olunsun dedikde akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda tâife-i nasârâdan Sava v. Yorgi ve Sava v. Yani nâm zimmîler li ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘î-i mezbûr Nikola mahalle-i mezbûrede vâki‘ olan menzilini mezbûr Panayot bana hibe ve teslîm eylemişidi deyû mezbûr Panayot’dan bizim huzûrumuzda da‘vâ ve taleb eylediğinde ol dahi inkâr etmekle vesâtat-ı muslihîn ile mezbûr Panayot müdde‘î-i mezbûr Nikola’yı da‘vâ-yı mezkûresinden dört bin akçeye sulh eyledikde mezbûr Nikola dahi sulh-i mezbûru kabûl edip bedel-i sulh olan meblağ-ı mezbûr dört bin akçe mezbûr Panayot zimmetinde kalmışidi. Biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle oldukdan sonra mûcebiyle meblağ-ı mezbûr dört bin akçenin edâsına mezbûr Panayot’a tenbîh birle mâ vaka‘a bi’t-taleb ketb olundu. Fi’l-yevmi’s-sâdis min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Eyüb Ağa el-Bevvâb-ı sultânî, Mustafa Çelebi b. Receb, Ahmed Yazıcı b. Mehmed, Emrullah b. Abdullah ve gayruhüm.