Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 326 Hüküm no: 413 Orijinal metin no: [61b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meyhaneci Nikola ile Yorgi’nin ortaklıklarını feshi ve sermayeyi paylaşmaları Mahmiye-i Galata’da meyhaneci tâifesinden işbu râfi‘ü’l-kitâb Yorgi v. Nikola nâm zimmî mahfil-i kazâda Nikola v. Rizo nâm zimmî muvâcehesinde üzerine da‘vâ ve takrîr-i kelâm edip bundan akdem mezbûr Nikola ile meyhânecilik san‘atında şerîkler olup hâlâ mezbûr ile fesh-i akd-i şirket etmekle sermâyemden olan beş bin akçe ve üç senede hisseme isâbet eden fâideden altı bin beş yüz ki cem‘an on bin akçemden ba‘de külli hesâb mezbûr Nikola’nın zimmetinde yedi bin beş yüz yirmi akçe hakkım zuhûr etmekle meblağ-ı mezbûru taleb eylediğimde edâdan imtinâ‘ eder, suâl olunup alıverilmesi matlûbumdur dedikde gıbbe’s-suâl merkūm Nikola cevâbında fi’l-vâki‘ müdde‘î-i mezbûrun beş bin akçe sermâyesinden ve üç senede hissesine isâbet eden fâideden altı bin beş yüz akçe ki cem‘an on bir bin akçesinden ba‘de külli hesâb zimmetimde yedi bin beş yüz yirmi akçe hakkı vardır deyû bi tav‘ihî ikrâr ve i‘tirâf etmeğin alâ mûcebi i‘tirâfihî meblağ-ı mezbûru müdde‘î-i mezbûra teslîme merkūm Nikola’ya tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa b. Receb, Ahmed Yazıcı b. Mehmed, Emrullah b. Mehmed, Zülfikār b. İbrahim, Hüseyin b. Mirza.