Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 337 Hüküm no: 429 Orijinal metin no: [64b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anna bt. Manusa, bağ hissesini Maryora bt. Masko’ya sattığı Mahmiye-i Galata’ya tâbi‘ Arnavudköyü demekle ma‘rûfe karyede sâkin bundan akdem hâlik olan Lizo bt. Andriye nâm zimmînin verâseti zevce-i metrûkesi Anna bt. Manusa nâm nasrâniyeye ve li ebeveyn karındaşı kızı Maryora bt. Masko’ya münhasıra olduğu şer‘an zâhir ve müte‘ayyin oldukdan sonra mezbûre Anna mahfil-i kazâda işbu râfi‘atü’l-kitâb merkūme Maryora muvâcehesinde ikrâr ve takrîr-i kelâm [edip] zevcim hâlik-i mezbûrun muhallefâtından olup karye-i mezbûre sınırı dâhilinde vâki‘ bir tarafdan el-Hâc Nasuh b. ( ) bağı ve bir tarafdan uncu Todori v. nâm zimmî bağı ve bir tarafdan Filipa v. ( ) nâm zimmî bağı ve bir tarafdan dere ile mahdûd dört dönüm bir kıt‘a mülk bağın rub‘-ı şâyi‘i benim hisse-i irsiyyeme ve selâse-i erbâ‘ı merkūme Maryora’nın hisse-i irsiyyesine intikāl ve isâbet etmekle hâlâ ben zikr olunan rub‘ hisse-i şâyi‘amı iki bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î [65a] ile merkūme Maryora’ya bey‘ ve teslîm, ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûru merkūme Maryora’nın yedinden bi’t-tamâm ahz ü kabz eyledim, ba‘de’l-yevm sâlifü’z-zikr bağın cümlesi mezbûrenin mülkü olmuşdur, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: El-Hâc Ramazan b. Mehmed, Ebûbekir Beşe b. Şaban, Mustafa b. Receb, Hüseyin b. Abdullah, Hamza b. Abdülganî ve gayruhüm.