Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 342 Hüküm no: 438 Orijinal metin no: [66a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Ahmed b. Abdurrahman’ın vasi tayini ve eşyasının tescili Mahrûsa-i Galata mahallâtından Câmi‘-i Kebîr mahallesinde sâkin el-Hâc Ahmed b. Abdurrahman nâm kimesne tasarrufât-ı şer‘iyyesi câize ve teberru‘ât-ı mer‘iyyesi nâfize olduğu hâlde meclis-i şer‘-i hatîr-i lâzımü’t-tevkīrde vech-i âtî üzre olan vasiyyetini tenfîze vasiyy-i muhtâr nasb ve ta‘yîn eylediği işbu râfi‘ü’l-kitâb el-Hâc Ali b. Ali nâm kimesne mahzarında ikrâr ve takrîr-i kelâm edip bi emrillâhi te‘âlâ dâr-ı dünyâdan saray-ı bekāya irtihâl ve teveccüh ettiğimde silk-i mülkümde münselik olan eşyâmdan yirmi aded Mısır hasırımı Arab câmi‘-i şerîfi hüddâmına teslîm edip onlar dahi hasbeten lillâhi te‘âlâ câmi‘-i mezbûr dâhilinde döşeyip cemâ‘at-i müslimîn üzerlerinde namaz kılıp isti‘mâl oluna ve vech-i mezkûr üzre vasiyyetimi tenfîze mezbûr el-Hâc Ali’yi vasî nasb ve ihtiyâr eyledim dedikde merkūm el-Hâc Ali dahi vesâyet-i mezbûreyi kabûl ve hizmet-i lâzımesin edâya müte‘ahhid oldukdan sonra mezbûr el-Hâc Ahmed meclis-i mezbûrda i‘âde-i kelâm edip zikr olunan hasırlardan mâ‘adâ emlâkımdan ancak bir köhne beyaz Cezâyir ihrâmı ve bir köhne yorgan ve bir müsta‘mel çarşaf ve altı aded müsta‘mel gömlek ve bir kırmızı köhne [66b] Sakız kuşağı ve bir köhne alaca kaftan ve bir köhne beyaz bornos ve bir Macariyyetü’l-asl câriyem olup bundan gayrı ismi mâl ıtlâk bir habbe ve bir şeyim yokdur dedikde mâ vaka‘a bi’t-taleb ketb olundu. Fi’l-yevmi’s-sâmin aşer min şehri Zilhicceti’ş-şerîfe li sene selâse ve seb‘în ve elf. Şuhûdü’l-hâl: Es-Seyyid Mehmed Efendi el-İmâm, Ramazan Efendi el-Kadı, el-Hâc Kenan Bey b. Abdullah, el-Hâc Mehmed b. Kâtib Kasım ve gayruhüm.