Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 344 Hüküm no: 440 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Nikite v. Dimitri’nin beytülmâl eminince elkonulan terekesinin kardeşi Panayot v. Dimitri’ye teslimi Vilâyet-i Rumeli’nde Yenişehir kazâsı müzâfâtından Ağrafa nâhiyesine tâbi‘ Kreşova nâm karye sâkinlerinden bâ‘is-i hâze’s-sifr Panayot v. Dimitri nâm zimmî mahfil-i kazâda mahmiye-i Galata’da bi’l-fi‘l voyvoda ve emîn-i beytülmâl olup kasaba-i Tophâne’de bakkal iken bundan akdem hâlik olan Nikite v. Dimitri nâm zimmînin zâhirde vâris-i ma‘rûfu olmamağla terekesine vâzı‘ü’l-yed olan Siyavuş Ağa tarafından husûs-ı âti’z-zikre vekîl-i müsecceli olan Ali Bey muvâcehesinde üzerine da‘vâ ve takrîr-i kelâm edip hâlik-i mezbûrun ben li ebeveyn karındaşı olup babamız merkūm Dimitri ve anamız Ağoni ve dedemiz ismi ( ) nâm zimmî ve maskat-ı re’simiz karye-i mezbûre olup hâlik-i mezbûrun verâseti ancak bana münhasıra olmağın hâlâ hâlik-i mezbûrun [terekesini] ber mûceb-i defter-i kassâm emîn-i müşârün-ileyhden taleb ederim, vekîl-i mezbûrdan suâl olunsun dedikde gıbbe’s-suâl vekîl-i mezbûr cevâbında hâlik-i mezbûrun terekesine müvekkil-i müşârün-ileyhin vaz‘-ı yed eylediklerini bi’l-vekâle ikrâr lâkin müdde‘î-i mezbûr hâlik-i mezbûrun vech-i muharrer üzre karındaşı ve hasren vârisi olduğun inkâr edicek, müdde‘î-i mezbûrdan müdde‘âsını mübeyyine beyyine taleb olundukda yine karye-i mezbûre ahâlîsinden olup tâife-i nasârâdan Yorgi v. Dimitri ve Dimitri v. Yorgi nâm zimmîler li ecli’ş-şehâde meclis-i şer‘a hâzırân olup isre’l-iştişhâd fi’l-hakīka mezbûr Panayot hâlik-i mezbûr Nikite ile li ebeveyn karındaşlar olup babaları ismi merkūm Dimitri ve anaları Ağoni ve dedeleri ( ) nâm zimmî ve maskat-ı re’sleri karye-i mezbûredir. Hâlik-i mezbûrun [terekesi] ancak müdde‘î-i mezbûr Panayot’a münhasıradır, bundan gayrı vâris-i ma‘rûfu ve tereke-i vâfiyesine müstahıkk-ı âharı olduğu ma‘lûmumuz değildir, biz bu husûsa şâhidleriz ve şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti’l-kabûl şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’r-râbi‘ aşer min Zilhicceti’ş-şerîfe li sene selâse ve seb‘în ve elf. Şuhûdü’l-hâl: El-Hâc Mustafa b. Ali, Ebûbekir Beşe b. Şaban, Hüseyin b. Mirza, Mustafa Çelebi b. Receb, Hüseyin b. Abdullah ve gayruhüm.