Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 344 Hüküm no: 441 Orijinal metin no: [66b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Abdülkâdir Kapudân’ın varislerinin, kendilerine miras kalan cariye Cenane’yi azat ettikleri Mahmiye-i Galata hâricinde vâki‘ el-Hâc Memi mahallesi sâkinlerinden olup bundan akdem vefât eden Abdülkādir Kapudân’ın verâseti zevce-i metrûkesi Emine Hâtun bt. el-merhûm Mahmud Efendi ile babası Abdürrahim Kapudân bt. Mehmed nâm kimesneye münhasıra olduğu şer‘an zâhir ve mütehakkik oldukdan sonra mezbûr Abdürrahim Kapudân asâleten ve mezbûre Emine Hâtun tarafından ıtk-ı âti’z-zikre vekîl olup hasm-ı şer‘î-i câhid mahzarında mezbûreyi ma‘rifet-i şer‘iyye ile ârifân olan Abdullah Efendi b. el-merhûm Mahmud Efendi ve Hüseyin b. Mehmed nâm kimesneler şehâdetleri ile şer‘an vekâleti sâbite olan sulbî kebîr oğlu Ahmed Çelebi b. Mehmed vekâleten meclis-i şer‘de müteveffâ-yı mezbûrdan merkūm Abdürrahim Kapudân ile müvekkile-i mezbûreye [67a] irs-i şer‘le intikāl edip rıkkını mu‘terife olan çatık kaşlı ve uzun boylu Eflakiyyetü’l-asl Cenâne bt. Abdullah muvâcehesinde bi’l-asâle ve bi’l-vekâle ikrâr ve takrîr-i kelâm edip mevsûf-ı mezbûr Cenâne’yi hasbeten lillâhi’l-azîm ve taleben li merzâti Rabbi’r-rahîm âzâd ve zümre-i ahrâr-ı asliyyîne idrâc [ve] ilhâk eyledik min ba‘d mevsûfe-i mezbûre sâir ahrâr-ı asliyyîn gibi hürre olup üzerinde velâdan gayrı hakkımız kalmadı dedikde mâ vaka‘a bi’t-taleb ketb olundu. Fi’l-yevmi’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mehmed Efendi b. Mustafa el-İmâm, es-Seyyid Mehmed Efendi b. ( ), Şaban Efendi b. el-Hâc Maden, Mustafa b. Abdullah ve gayruhüm.