Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 351 Hüküm no: 451 Orijinal metin no: [68b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Hüseyin’in evini bütün müştemilatıyla Hacı Halil b. İbrahim’e sattığı Mahmiye-i Galata hâricinde Müeyyedzâde mahallesinde sâkin Ali Çelebi b. Hüseyin nâm kimesne tarafından ikrâr-ı âti’l-beyânı tasdîka vekîl olup Ebûbekir Beşe b. Şaban ve Mustafa Çelebi b. Receb nâm kimesneler şehâdetleri ile şer‘an vekâleti sâbite olan Süleyman Çelebi b. Ali nâm kimesne meclis-i şer‘-i hatîr-i lâzımü’t-tevkīrde hâfız-ı hâze’l-kitâb el-Hâc Halil b. İbrahim nâm kimesne mahzarında bi’l-vekâle ikrâr ve takrîr-i kelâm edip müvekkil-i mezbûrun silk-i mülkünde münselik olup mahalle-i merkūmede vâki‘ bir tarafdan İsmihan bt. Abdurrahman nâm Hâtun mülkü ve iki tarafdan mezbûr el-Hâc Halil’in âhar mülkü ve bir tarafdan tarîk-i âm ile mahdûd olup dört bâb fevkānî odaları ve iki yan sofası ve bir tahta-pûşu ve bir kenîfi ve bi’r-i mâyı ve muhavvatayı müştemil mülk menzilini cümle tevâbi‘ ve levâhıkı ile mezbûr el-Hâc Halil’e altmış bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezbûr altmış bin akçeyi müvekkil-i merkūm el-Hâc Halil yedinden bi’t-tamâm alıp kabz eyledi ba‘de’l-yevm menzil-i mahdûd-ı mezkûr mezbûr el-Hâc Halil’in mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: El-Hâc Kenan Bey b. Abdullah, Receb Bey el-Bevvâb-ı sultânî, el-Hâc İbrahim b. Hüseyin, el-Hâc Hüseyin b. Abdullah, el-Hâc Ömer b. Abdullah ve gayruhüm.