Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 351 Hüküm no: 450 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime ve Kerime’ye babaları Nasuh’dan intikal eden evin aralarında taksim edildiği Husûs-ı âti’l-beyânın mahallinde istimâ’ı savb-ı şer‘den mevlânâ Abdülgaffâr Efendi irsâl olunup ol dahi hâssa mi‘mârlarından üstâd Ali b. Abdullah ile mahmiye-i Galata müzâfâtından İstinye nâhiyesine tâbi‘ kal‘a-i Boğazkesen dâhilinde vâki‘ Rahime ve Kerime binteyn Nasuh nâm hâtunların sâkineler oldukları bir tarafdan Belkıs Hâtun bt. ( ) mülkü ve iki tarafdan tarîk-i hâs ile ve bir tarafdan tarîk-i âm ile mahdûd fevkānî iki bâb odalar ve bir tahta-pûş ve bir ayak dehlizi ve tahtânî bir bâb oda ve bir fırın ve bir kenîf ve bir mikdâr eşcâr-ı müsmireyi hâvî bahçeyi ve iki aded asmayı müştemil menzile varıp zeyl-i kitâbda muharrerü’l-esâmî olan müslimîn ile akd-i meclis-i şer‘ eyledikde bâ‘isetü hâze’l-kitâb mezbûre Rahime meclis-i ma‘kūd-ı mezkûrda li ebeveyn kız karındaşı mersûme Kerime muvâcehesinde takrîr-i kelâm edip mezbûre Kerime ile ma‘an işbu sâkine olduğumuz menzil bundan akdem fevt olan babamız mezbûr Nasuh’un mülkü olup ba‘de vefâtihî irsen ikimize intikāl edip târih-i kitâba gelince[ye] değin mezbûre Kerime ile menzil-i mersûmda ma‘an sâkine olmuşidik hâlâ menzil-i merkūm mezbûre ile beynimizde taksîm ve alâmât-ı fâsıla vaz‘ olundukdan sonra nısf hisse-i irsiyyem bana teslîm olunmak matlûbumdur dedikde mi‘mâr-ı merkūm menzil-i mersûmu mesâha eyledikde menzil-i mezbûrun cânib-i şimâlîsinde vâki‘ bir bâb fevkānî oda ve mârrü’z-zikr tahta-pûş ve sâlifü’z-zikr tahtânî oda ve fırın mezbûre Rahime’nin hissesine ta‘yîn ve cânib-i kıblîsinde vâki‘ bir fevkānî oda ve bir ayak dehlizi ve tahtânî bir kenîf ve zikr olunan bahçe ve iki aded asmalar merkūme Kerime’nin hissesine tahsîs olunup hisseteyn-i mezkûreteynin her biri kıymetinde âhara müsâvî olduğunu mi‘mâr-ı mezbûr haber vermekle hisseteyn beyninde alâmât-ı fâsıla vaz‘ olundukdan sonra mezbûretânın her biri tâyi‘aten taksîm-i mezbûra râzıye olduğunu mûmâ-ileyh efendi mahallinde tahrîr, ba‘dehû ma‘an irsâl olunan Hüseyin b. Mirza ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mehmed Efendi b. Ali el-Hatîb, Mehmed Efendi b. Mustafa el-İmâm, el-Hâc Ali Efendi b. Hüseyin el-İmâm, Yusuf b. Abdullah, Ahmed Yazıcı b. Mehmed ve gayruhüm.