Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 353 Hüküm no: 453 Orijinal metin no: [69a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Halil’e, Musli b. Hüseyin’e olan borcunu ödenmesi hususunda tenbihte bulunulduğu Mahrûsa-i Galata dâhilinde Câmi‘-i Kebîr mahallesinde sâkin râfi‘-i hâze’l-kitâb el-Hâc Musli b. Hüseyin mahfil-i kazâda sefîne reislerinden İbrahim b. Halil mahzarında üzerine da‘vâ ve takrîr-i kelâm edip mezbûr İbrahim zimmetinde cihet-i sermâyeden ba‘de külli hesâb dokuz bin akçe hakkım olup taleb eylediğimde edâdan imtinâ‘ eder, suâl olunup alıverilmesi matlûbumdur dedikde gıbbe’s-suâl merkūm İbrahim cevâbında fi’l-vâki‘ cihet-i sermâyeden ba‘de külli hesâb müdde‘î-i mezbûra zimmetimde dokuz bin akçe vâcibü’l-edâ ve lâzımü’l-kazâ deynim vardır dedikde alâ mûcebi i‘tirâfihî meblağ-ı mezbûru müdde‘î-i mezbûra edâya merkūm İbrahim’e tenbîh birle mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mustafa b. Receb, Şaban b. Mehmed, Ahmed b. Musa, Âbid b. Mustafa, Hüseyin b. Mirza ve gayruhüm.