Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 353 Hüküm no: 454 Orijinal metin no: [69a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Mehmed b. Hacı Ali’nin, vasiyetini tenfize Hacı Selim’i vasi tayin ettiği Husûs-ı âti’l-beyânın mahallinde tahrîri iltimâs olunmağın savb-ı şer‘den mevlânâ Mehmed Efendi irsâl olunup ol dahi zeyl-i kitâbda muharrerü’l-esâmî olan müslimîn ile mahmiye-i Galata’da Câmi‘-i Kebîr mahallesinde vâki‘ el-Hâc İbrahim nâm kimesnenin menziline varıp akd-i meclis-i şer‘ eyledikde menzil-i mezkûrda müste’cir olan el-Hâc Mehmed b. el-Hâc Ali nâm kimesne meclis-i ma‘kūd-ı mezkûrda vech-i âtî üzre vasiyyetini tenfîze vasî nasb eylediği işbu râfi‘ü’l-kitâb el-Hâc Selim b. el-Hâc İbrahim mahzarında ikrâr ve takrîr-i kelâm edip ben niyet-i hâlisa ile şöyle vasiyyet eyledim ki küllü nefsin zâ’ikatü’l-mevt ve küllü hayyin yülâkīhi’l-fevt mısdâkınca emr-i Hak ile melekü’l-mevt girîbânımı câk ve cism-i nâtuvânımın menzilgehin hak edip sem‘-i rûh-ı revânım yâ eyyetühe’n-nefsü’l-mutma’inne irci‘î ilâ rabbiki râziyyeten marziyye nidâsını gûş u dest-i sâkī-i ecelden câm-ı fenâ encâmını nûş ettiğimde silk-i mülkümde münselik olan bir mâî dolama ve bir kaput ve bir kilim ve bir minder ve bir yastık ve bir dimi ve üç göğüslük ve bir don ve üç gömlek ve iki sarık ve bir barata ve bir tencere ve nakid üç bin akçemden gayrı ismi mâl ıtlâk olunur bir şeyim yokdur ve meblağ-ı mezbûr üç bin akçenin iki bin akçesini techîz ve tekfînime harc [u] sarf eyledikden sonra meblağ-ı bâkī bin akçe ile zikr olunan eşyâlarımı hâlâ cezîre-i Tunus’da sâkin li ebeveyn karındaşlarım ve vârislerim olan el-Hâc Ahmed ibney el-Hâc Ali’ye irsâl eyleye deyû vasiyyet ve vech-i mezkûr üzre olan vasiyyetimi tenfîze mezbûr el-Hâc Selim’i vasî nasb eyledim dedikde mezbûr el-Hâc Selim dahi kabûl ve hizmet-i lâzımesin edâya müte‘ahhid olduğunu mevlânâ-yı mezbûr mahallinde tahrîr, ba‘dehû ma‘an irsâl olunan el-Hâc Rıdvan b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Mehmed Efendi b. Bilâl, el-Hâc İbrahim b. Ali, Mehmed Hoca b. Ramazan, el-Hâc Kasım b. İbrahim, es-Seyyid Mehmed b. Ali ve gayruhüm.