Galata Mahkemesi 90 Numaralı Sicil (H. 1073 - 1074 / M. 1663) cilt: 40, sayfa: 357 Hüküm no: 461 Orijinal metin no: [70a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamalların Tophane iskelesinden taşıdıkları eşyadan fazla ücret talep etmemeleri Mahmiye-i Galata müzâfâtından kasaba-i Tophâne ahâlîsinden ashâb-ı hâze’l-kitâb Receb Efendi b. İsmail ve Ali Efendi ve Mehmed Efendi ve Ahmed Çelebi b. Mehmed ve Mehmed Çelebi b. Gazanfer ve Mehmed Çelebi b. el-Hâc İbrahim ve Şükrullah b. Hasan ve Zülfikār Bey b. Abdullah ve Vefâ b. Şaban nâm kimesneler ve sâirleri meclis-i şer‘de kasaba-i mezbûre iskelesinde arka hamallarından olan Hasan b. Hüseyin ve İlyas b. Kalender ve Bâli b. Pîrî ve sâirleri ve at hamallarından olan Mehmed b. Ali ve sâirleri muvâcehelerinde her biri üzerlerine da‘vâ ve takrîr-i kelâm edip bundan akdem narh-ı pâdişâhî üzre arka hamalları zikr olunan Tophâne iskelesine götürdükleri eşyâ için hammâliyye bir akçe ve Defterdâr Câmi‘i mahallesine götürdüklerinde iki akçe ve Ağa hamamına üç akçe ve Ağa Câmi‘i mahallesine dört akçe ve Cihangir câmi‘ine üç akçe hammâliyye alınagelip ve at hamallarına dahi sâlifü’z-zikr Defterdâr Câmi‘i mahallesine iki akçe ve Fîruz Ağa Câmi‘i mahallesine dört akçe ve Cihangir Câmi‘i mahallesine dahi beş akçe hammâliyye alınagelip ziyâde alınagelmiş değil iken mezbûrlar ziyâde talebiyle bize rencîdeden hâlî değiller iken mezbûrlar ziyâde alırlar, suâl olunup ziyâde taleb etmemek üzre merkūmûna tenbîh olunmak matlûbumuzdur dediklerinde gıbbe’s-suâl mezbûrûn cevâblarında husûs-ı mezbûr için minvâl-i muharrer üzre idi deyû her biri ikrâr ve i‘tirâf eylediklerinden mâ‘adâ husûs-ı mezbûr ahâlî-i kasaba-i mezbûreden suâl olundukda bî-garaz müslimînden Ali Kapudân b. Şaban ve Ebülfazl mahallesinden Ahmed Efendi b. Muharrem ve Sirkecibaşı mahallesinden Mustafa Ağa b. Abdülmennân ve Ahmed Efendi b. Mustafa nâm kimesnelerden istihbâr olundukda fi’l-hakīka kadîmden narh-ı pâdişâhî üzre sâlifü’z-zikr Tophâne iskelesinden arka hamallarının Defterdâr câmi‘ine götürdükleri eşyâ için bir akçe ve Fîruz Ağa mahallesine iki akçe ve Ağa hamamına üç akçe ve Ağa Câmi‘ine dört akçe ve Cihangir [70b] mahallesine üç akçe hammâliyye alınagelip ve at hamallarının dahi sâlifü’z-zikr Defterdâr Câmi‘i mahallesine götürdükleri eşyâ için iki akçe ve Fîruz Ağa mahallesine üç akçe ve Ağa hamamına dört akçe ve Ağa Câmi‘ine Beş akçe ve Cihangir mahallesine beş akçe hammâliyye alınageldiğin biliriz, ziyâde aldıkları ma‘lûmumuz değildir deyû her biri alâ tariki’ş-şehâde haber vermeğin bâlâda tahrîr olunandan ziyâde taleb etmemek üzre merkūmûn hamallara tenbîh ve mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Zilhicceti’ş-şerîfe li sene selâse ve seb‘în ve elf. Şuhûdü’l-hâl: Nasuh Efendi el-Kadı, Abdülkerim Çelebi el-Müderris, Mustafa Çelebi b. Receb, Mustafa b. Emrullah ve gayruhüm.